Derya Ren

 

NAVENDA NÛÇEYAN – Çavkaniyek ku têkildarî îşkencekirina sivîlan a ji aliyê leşkerên bi cilên hikûmeta demkî ya Şamê ve li bajarê Siwêdayê, tevî agirbesta ragihandî, bi ajansa me re têkilî danî, got, "Qet agirbest çênebû. Îro, gelek niştecihên Siwêdayê ji aliyê van endamên DAIŞ'ê yên bi cilên fermî û hêzên ewlehiyê yên Şamê ve hatin kuştin."

 

Di demekê de ku komkujiyên li dijî Durzîyên li bajarê Siwêdayê yê Sûrîyeyê berdewam dikirin, hikûmeta demkî ya Şamê diyar kir ku êrîş di navbera eşîran de bûne û agirbest hatiye îmzekirin.

 

Lêbelê, wêneyên ku gihîştine ajansa me leşkerên bi cilên fermî yên hikûmeta demkî ya Şamê li tax û kolanên Siwêdayê nîşan didin.

 

Leşkerên bi cil û bergên fermî îşkenceyê li sivîlan dikin tên dîtin.

 

'Rewşa ku em dijîn pir xirab e'

 

Çavkaniyek ku me li Siwêdayê pê re têkilî danî derbarê vê mijarê de diyar kir ku destûr nayê dayîn ku ambulans û wesayîtên alîkariyê bikevin hundir û got: "Hîn jî cenazeyên mirovên ku li kolanan hatine kuştin hene. Em nikarin wan bibin nexweşxaneyê û wan veşêrin. Bêhna nexweşxaneya bajêr pir xirab e. Rewşa ku em dijîn pir xirab e."

 

'Agirbest tune ye'

 

Heman çavkaniyê, diyar kir ku ew hîn jî li bajêr e û got: "Hat gotin ku hikûmeta Şamê ji bajêr derketiye. Lê ne wisa ye; ew tenê rojekê li paş  man. Lê paşê dîsa ketin hundir. Ciwanên Siwêdayê li dijî komkujiyan xwe parastin kirin û şer dest pê kir. Hemû dezgehên medyayê dibêjin ku agirbest hebû. Ev hemû derew e. Qet agirbest tune bû. Îro, gelek niştecihên Siwêdayê ji aliyê van endamên DAIŞ'ê yên bi cilên leşkerî û hêzên ewlehiyê yên Şamê ve hatin kuştin."