AMED - Konferansa Parlamenterên Jin ên Kurd ku ji aliyê TJA'yê ve tê organîzekirin bi parvekirina ezmûnan dewam dike. Di konferansê de hate gotin ku jinên Bakur û Rojhilatê Sûriyê peyama Rêberê Gelê Kurd Abdullah Ocalan ji xwe re esas girtine û wiha hat gotin, "Peyam ji bo hemû şer û pevçûnên li Rojhilata Navîn tên kirin, çareseriyê pêşkêş dike. Divê jin pêşengiya projeya aştî û civaka demokratîk bikin."

 

Bi pêşengiya Tevgera Jinên Azad (TJA) di navbera 28-29’ê Gulanê de li Çanda Amedê Konferansa Parlamenterên Jin ên Kurd tê lidarxistin. Endamên TJA'yê, parlamenterên jin ên Kurd û nûnerên partiyên siyasî yên Kurdistanî, Rojhilata Navîn û Ewropayê beşdarî konferansê bûn. Li salona konferansê pankarta “Jin siyaseta demokratîk dimeşînîn, civaka demokratîk ava dikin” û pankartên “Jin jiyan azadî”, “Cinîya azad komelo azad”, “Jin azad dibe civak azad dibe” bi zimanên Kurdî, Tirkî, Zazakî û Erebî hatin daliqandin. Her wiha gelek jin bi cil û bergên xwe yên neteweyî beşdarî konferansê bûn.

 

Leyla Zana: Jinên Kurd ji cîhanê re bûne mînak

 

Di rûniştina ku moderatoriya wê parlamentera DEM Partiyê ya Şirnexê Newroz Ûysal kir de ewilî siyasetmedara Kurd Leyla Zana axivî. Leyla Zana qala pêvajoya hilbijartina xwe ya parlamentoyê û berxwedana zindanan a di sala 1980yan de kir. Leyla Zana diyar kir ku ji wê rojê ve di nêzîkatiya pergalê de guhertinek nîne û wiha got: “Me wê rojê jî xwişk û biratî dixwest em û îro jî dixwazin. Zindan be jî, parlamento be jî kolan be jî ji bona me her tim qada têkoşînê ne. Divê nifşê nû ji xwe bawer bin. Em li ser dozeke heq in. Neheqî li me hatiye kirin. Yên hatine tunekirin em bûn. Hem di warê jinan de hem di warê neteweyî de em xwedî li xwe derketin û îro jinên kud ji cîhanê re bûne mînak.”

 

‘Jiyaneke hevbeş deriyekî girîng e ji bo pêşerojeke biedalet’

 

Dû re siyasetmedar Semîra Goran a ji Başûr tevli konferansê bûyî axivî. Semîra Goran çareseriyeke aştiyane û demokrasi ji bere pir girîngtir e. Aramî bi hev re jiyan di dewletê de misoger be ev pêngaveke erênî ye ji bo pêşeroja gelê Kurdistanê. Wekhevî û jiyaneke hevbeş deriyekî girîng e ji bo pêşerojeke biedalet ji bo gelê Kurdistan û pêkhateyên di nava wan de dijîn. Serkeftinê ji konferansê re dixwazim û hêvî dikim ku encamên wê ji bo pêşerojeke aram bibin wesîle.

 

‘Hêvî dikin ku Kurd li her çar parçeyên Kurdistanê bigihin mafên xwe’

 

Dû re parlamentera Iraqê Kurda Emer axivî. Kurda Emer diyar kir ku guhertineke pir mezin li Rojhilata Navîn heye û wiha got: “Hêvî dikim ku Kurd li her çar parçeyên Kurdistanê bigihin mafên xwe. Em hêvî dikin ku meseleya çareseriyê kurd li Tirkiyeyê bi ser bikeve.” Kurda Emer pişt re qala pêvajoya xebatên xwe yên siyasî kir û xebatên ku li ser jinan li parlamentoyê de meşandine kir.

 

‘Konferans ji bo bidestxistina mafên jinan girîng e’

 

Siyasetmedar Kurdistan Pirdawid jî konferans pîroz kir û diyar kir ku ji bo bidestxistina mafên jinan konferans girîng e. Kurdistan Pirdawid anî ziman ku ji bo komkirina hêzên jinan û parastina mafên xwe dê zêdetir bixebitin û qala xebatên xwe kir. Kurdistan Pirdawid, qala pirsgirêkên jinan ên li Başûr û Iraqê jî kir. Kurdistan Pirdawid bi lêv kir ku rola jinan niha zêdetir bûye û ji deh saliya xwe heta niha di nava xebatan de ye. Kurdistan Pirdawid wiha berdewam kir: “Rêya Kurdiyatiyê li her çar aliyê Kurdistanê heye. Divê em weke jin bi taybetî vê xebatê bimeşînin û hevdû bigirin. Hêvî dikim ku partiyên siyasî zêdetir piştgiriya hevdû bigirin. Em jî Başûr piştgiriya we dikin.”

 

‘Divê jin pêşengtiya projeya avakirina civaka aştî û demokratîk bikin’

 

Hevseroka Meclisa Rêveber a Rêveberiya Xweseriya Demokratîk Evîn Siwêd ji bajarê Qamişlo yê rojavayê Kurdistanê bi rêya onlinê tev li konferansê bû. Evîn Swêd qala xebatên jinan ên li Rojava kir û wiha got: “Jin civakeke demokratîk ava dike. Azadiya civakê ji azadiya jinê dest pê dike. Loma em vê valahiyê digerin. Em îro di nava pêvajoyeke dîrokî re derbas dibin. Em ê Bakur û Rojhilatê Sûriyeyê destkeftiyan berfirehtir bikin. Hevpeymaneke civakî li Bakur û Rojhilatê Sûriyeyê hate diyarkirin û hemû pêkhateyan diparêze. Em li ser lidarxistina hevpeymaniya jinan dixebitin. Li Sûriyeyê zehmetî zêdetir dibin. Em jinên Sûriyeyê bi hemû îradeya xwe em ê destkeftiyên xwe yên jinan biparêzin. Wekî jinên Bakur û Rojhilatê Sûriyeyê em banga birêz Abdullah Ocalan esas digirin. Ev ji bo hemû pirsgirêkên li Rojhilata Navîn çareserî ye. Divê jin pêşengtiya projeya avakirina civaka aştî û demokratîk bikin. Em piştgiriya xwe ji we re radigihînin û serkeftinê ji we re dixwazin. Jin jiyan azadî.”

 

Dê konferans bi rûniştina sêyem bidome.