Rûken Ehmed: Lazimî bi awankerdişê komîteyê hempar est o 

2025-05-23 10:57:02


	 

	Dîlan Babat

	 

	SILÊMANÎ - Endama têkilî, tifaq û sîyasetê demokratîk ê Kongreya Star û endama komîteyê amadekarî ya NADA'yî Rûken Ehmed, dîyar kerd ke ganî bi vengêk hempar wayîrê têkoşînê cinîyan bêro vetiş û va, bi awankerdişê komîteyê hempar lazimî bi neqlkerdişê tecrubeyê cinîyan est o.

	 

	Koalîasyonê Cinîyan ê Demokratîkî yê Rojhelatê Mîyanên û Herêma Vakurê Afrîkayî (NADA) mabêne 15-17ê gulane de Silêmanî de yewine kongreya xo kerd û bi netîcename peynî bî. Munaqeşeyan de belgeyê "şorişê cinî" ameyî pêşkêşkerdiş û munaqeşeyan de bêmabêne manîfestoyê konfederalîzmê demokratîkî yê Rayberê Şarê Kurdî Abdullah Ocalanî ca girewt.

	 

	Endama Têkilî, tifaq û sîyasetê demokratîkî ya Kongreya Starî û endama komîteya amadekarî ya NADA'yî Rûken Ehmed ajansê ma rê qisey kerd.

	 

	‘Konfederalîzmê demokratîk sîstemêk alternatîf o’

	 

	Rûken Ehmed wina qalê kongre kerd: “Me derheqê amanc û muhîmîyê kongreya hîrê rojan de munaqeşe kerd. Raporê 4 serran ame eşkerakerdiş. Kêmî û xorexnedayîş ame kerdiş. Roja ewilî de têkoşînê cinîyan û şîdetê cinîyan ser ame munaqeşekerdiş. Ma qirkerdişê cinîyan yê şerê dinya ser o vindertî. Munaqeşeyî kûr û muhîmî bî. 19 welatan ra cinî tewrê kongre bî. No zî mojna ke her cayî de têkoşînê cinîyan est o. Ganî bi hawayêko hempar wayîrê têkoşînê cinîyan bêro vejîyayîş. Sewbîna ame munaqeşekerdiş ke hemverê nê sîstemî de sîstemê konfederalîzmê demokratîkî bibo sîstemêk alternatîf.”

	 

	‘Belge ameyî pêşkêşkerdiş’

	 

	Rûken Ehmed dîyar kerd roja diyîne kongreyî de pêşnîyaz û çareserî munaqeşe bîyî û va: “Têkoşînê şorişê cinîyan ê Rojawan ke ganî senî bêro vilakerdiş munaqeşeyî ameyî kerdiş. Şorişê cinîyan ser o ma belge pêşkêş kerd û NADA nê belgeyê stratejîyêk senî pê yeno qiseykerdiş ame kerdiş. Yew nê belgeyan ra konfederalîzmê demokratîkî, ya bîn zî paradîgmaya azadîya cinî bî. Konfederalîzmo demokratîk ame munaqeşekerdiş. Nê belgeyan ser o ame vindertiş.”

	 

	‘Ganî komîteyê hempar bêrê awankerdiş’

	 

	Rûken Ehmed dewam de wina va: “Ganî komîteyê herêmî bêrê awankerdiş. Ganî cinî her wareyê komelî de ca bigîrê. Nê esasî de ganî ma paştdayîş bidê yewbînan. Ganî têkoşînêk komelî pê bêro. Sûdan ra heta Îran, Fîlîstîn, semedê pêro cinîyan paştdayîş ame kerdiş. Nê semedî ra bernameyê ma tîya nêqedênê. Xeylêk babetan de ganî ma amancê xo pîya dîyar bikerê. Ganî şorişê cinî ma ver bi komelê azad de bero. Ganî serkêşîya komelê demokratîk bêro kerdiş. Nê hetî ra ma eşkenê tedayan hukmatî ser o û sîstemî ser o bikerê.”