Dîlek Akdag: Semedê madenî dewêke amî awankerdiş

2025-07-04 11:14:36


	 

	Memîhan Zeydan

	 

	WAN- Verfeka Eko-DERî ya Wanî Dîlek Akdag dîyar kerd ke madenê komirî yê qezaya Payîzava wareyê cuye ser o ameyo awankerdiş û şarî koç kerdo. Dîlek Akdag wina va: “Çem, mêrg, heywanî zirarêk pîl vînenê. La no zirar nîno vînayîş û yeno peygoşkerdiş.”

	 

	Îqtîdar, herra Kurdistanî bêhuqûqî û bêqanûnî pêşkêşê terefgiranê xo keno û îmza erzeno binê talanî. Demêk nêzdî de dewa Şamanîsî ya Payîzava ya Wanî bi pêroyî çin kerd û semedê xebatanê madenî veng kerd. Destpêkerdişê nê xebatanê madenî dir dewijî herra xo ra bî. Zirarê xebatanê madenî yê semedê derûdorî û xoza zî xeylêk pîl o. 

	 

	Verfeka Eko-DERî ya Wanî Dîlek Akdag derheqê xebatê ke yenê kerdiş de qisey kerd.

	 

	‘Ma zanê ke rijnayîşê pîlî pê anê’

	 

	Dîlek Akdag dîyar kerd ke madenê komirî yê Payîzava aydê karsazê AKP’yî Veysî Urunî yo û va:  “No madenê komirî texrîbatanê cidî awan keno. Zirar dano awa şimitişî û pêro awan. Ma zanê ke zirarêk pîl dano xoza û cuya merdiman. Ocaxe 2022ine de amî awankerdiş. Vernîya serranê 90î de faliyetê komirî estbî yo. La 1990ine de ameyo vindarnayîş. 2022ine de kargerîyê madenî yê Vefa kewto dewre.”

	 

	‘Dewe ameya vengkerdiş’

	 

	Dîlek Akdag erjnayîşê xo wina dewam kerd: “Demê koma Veda dest bi falîyetan kerd, vatî do zirar nêdê derûdor. La ewro ma vînenê ke xoza, heywanî zirarêk pîl vînenê. Tozê komirî her cayî de vila beno. Keweno herre û awe. Ekosîstem xira bîyo. Pêwa nê merdiman zirarê pîlî vînayî. Dewe bi pêroyî amî vengkerdiş û maden ame awankerdiş. Dewe dewa karsazê AKP’yî Veysel Urunî ya. Yê ke dewa ra koç kerdî zî merdimê Veysel Urunî bî. Kapîtalîzm ameyo nokteyêk wina ke çîyêk verê çiman de nîno girewtiş û her çî semedê berjewendî yeno destgirewtiş.”

	 

	'Do rayîr ver rijnayîşê komelkî abikero’

	 

	Dîlek Akdag dîyar kerd ke semedê falîyetê madenî  koçberî do rayîr verê rijnayîşê komelkî abikero û va: “Xebatê madenî parçeyêk polîtîkaya şerî yê. Bêşik na xebate tena Kurdistan de nîna kerdiş, her cayê Tirkîya yena kerdiş. Rewşa qanûnê torbeyî meclîsî ra derbas bibo, do heqê îtîrazî yê şarî û ekolojîstan dest ra bêro girewtiş. Ma do heta peynî taqîbkerdoxê babete bibê.”