Dosyaya Rojîn Kabaîşe: Şîdetê dewlete, hukm û serdestîyê mêrdan 2025-10-20 10:19:30   STENBOL - Hemverfeka HDK’yî Dîdem Yilmaz derheqê merdişê biguman ê Rojîn Kabaîşî de qisey kerd û va: “Qetlê Rojîn Kabaîşe şexsî nîyo, eksê ci meselayêka cematî ya. Ganî zordarîya cematî yê hemverê nê meselayan de zafêr bibê.”   Wendekara Zanîngeha Yuzuncu Yilî Rojîn Kabaîş ke 27ê teşrîna verêne 2024ine de wargeh ra vejîya û reyke bîne anêgêra, 18 rojan dima ra 15ê teşrîna verênê de cenazaya ci qeraxê Molakasimî de ameye dîyayîş. Dimayê ke cenazaya aye ameye dîyayîş, raporê ATKyê Stenbolî de ame vatiş ke “dayeyê desteştişî nêameyo dîyayîş” û serrêk dima ra 10ê teşrîna verênê de eynî sazgehî ra rapor ame û va DNAyê di mêrdan serê bedenê Rojîne de ame dîyayîş, yewê ci sîneyê aye ser ci û yewna zî serê vajînayê aye de ame testpîtkerdiş. Pey na mesela de her cayê Tirkîya ra reaksîyonê girdî ameyî mojnayîş û çalakî û protestoyî dewam kenê.   Hemverfeka Kongreya Demokratîke ya Şaran (HDK) Dîdem Yilmaz derheqê merdişê biguman ê Rojîn Kabaîşe de qisey kerd.   ‘Sîstema serkêşî ya mêrdan’   Dîdem Yilmaz eşkera kerd ke qetlê Rojîn Kabaîşe, perçeyêk polîtîkaya şerê taybetî ya ke Kurdistan de yeno domnayîş o  û va ganî no sey merdişêk biguman nêro ercnayîş, no perçeyêk polîtîkaya şerê taybetî yo ke dewlete Kurdistan de domnena. Dîdem Yilmaz wina va: “Dêrsim de 5ê çeleyê 2020ine de wendekara zanîngeha Munzurî Gulîstan Doku zî vînî bî. Mîsalê Gulîstan Doku de zî eynî çî ameyî ciwîyayîş. Ma cinîyê ke bedenê înan hetê dewlete û hêzanê dewletî ra ameyî teşhîrkerdiş zî dîyî. Gumanbarê nê meselayan sîstemê edaletê serkêşî yê mêrdan o.”   ‘Wazenê gumanbarî binimnê’   Dîdem Yilmaz prosesê merdişê biguman ê Rojîn Kabaîşe erjna û wina va: “Na dewa serrêk ra zafêr o dewam kena. Merdişê ci aye sere ra biguman ame dîyayîş, la înan sey întîxar mojna. Qerara nimitişî dosyayî ser o da û gumanbarî ke ameyî zanayîş ameyî pawitiş. Na meselaya ke ci ra vatî întîxar o, DNAyê di mêrdan bedenê Rojîne ser o ame dîyayîş. No zî îhtîmalê întîxarî bi temamî werte ra wedarena. Ma vînenê ke sîstemê edaletî vera ke raştîyan vejo werte, gumanbaran paweno, nimineno.”   ‘Gumanbarê heme cînayetê cinîyan zîhnîyetê serdestî yê mêrdan o’   Dîdem Yilmaz eşkera kerd ke her cayê Tirkîya de semedê Rojîn Kabaîşe têkoşîn yeno domnayîş û wina va: “Semedo ke edalet bica bêro, keyeyê Rojîn Kabaîşe serrêk o têkoşîn keno. Dimayê nê ganî sazgehê cinîyan, wendekarî piştgirîya têkoşînî bidê. Ma cinî wazenê gumanbarî bêrê muhakemekerdiş. Tîya de xeylê cayanê Tirkîya û Kurdistanî de derheqê Rojîne de çalakî virazîyenê. Ganî cemat tena mesela Rojîne de nê, reaksîyon vera heme cînayetan bimojno. Babeta caardişê edaletî de cinî kuçeyan de têkoşîn kenê. Bi taybetî serrêke yo semedê Rojîne têkoşîno ke yeno dayîş muhîm o. Ma zî hewl danê piştgirî bidê. Semedo ke edalet bica bêro, xpra heme çî raşt ê, delîl raşt ê. Ganî dest pawitişê gumanbaran verabidê. La ma vînenê ke gumanbarî hetê zîhnîyetê serdestî yê mêrdan ra yenê pawitiş.”   ‘No cînayetêk şexsî nîyo’   Dîdem Yilmaz wina qiseykerdişê xo qedêna: “Ganî ma zordarîya xo ya hemverê hedîse de zafêr bikerê. Keye, bi hewldayîşê xo serrêke yo têkoşîn keno. Hetê hîn kesan ra piştgirî ame dayîş. Çapemenîya komelî de derheqê Rojîn Kabaîşe de parekerdişî ameyî kerdiş. La gelo no qîm keno? Nê qîm nêkeno. Ganî ma semedê nê kuçeyan de vengê xo berz bikerê. Ganî zordarîya cematî hîna zaf berz bibo. Ganî ma cinî vengê xo berz bikerê. Ma wazenê gumanbarê Narîn Guran, Gulistan Doku û Rojîn Kabaîşe lezkî bêrê dîyayîş”