Bê Cîhan Bîlgîne serrêke: Bî çim û qelema şarî  

2025-12-17 10:56:32


	 

	Gulîstan Gulmuş

	 

	RIHA - Hevala Cîhan Bîlgîn, mûxabîra ANHAyî Silava Abdurrahman yewine serrgêra qetilkerdişê Cîhan Bîlgîne de qisey kerde û va: “Ma semedê caardişê xeyalanê aye bixebitîyê. Îradeyê ma tu wext do nêşikîyo. Hevalê ma do zerrîya ma de biciwîyê.”

	 

	Çapemenîya azade bi serran o bi bedelanê giranan peyê heqîqetî de şina û cigêrayîşê heqîqetî bi xoverdayîşêko gird dewam kena. Yew xebatkaranê çapemenîya azade Cîhan Bîlgîne zî pêro cuya xo pey heqîqetî de şîye.

	 

	Xebatkarê çapemenîya azade ke her tim bîyê hedef, tewr peyênî rojnameger Cîhan Bîlgîn û Nazim Daştan ameyî qetilkerdiş. Cîhan Bîlgîn û Nazim Daştan 19ê Kanûna 2024ine de, demo ke xoverdayîşê Awbendê Tişrînî yê Vakur û Rojhelatê Sûrîye taqîb kerdêne, bi SÎHAyanê Tirkîya ameyî qetilkerdiş.

	 

	Hevala Cîhan Bîlgîn, rojnamegera Ajansê Xeberan ê Hawarî (ANH) Silava Abdurrahman yewine serrgêra qetilkerdişê Cîhan Bîlgîne de qisey kerd.

	 

	‘Cuye sey dibistanêke bî’

	 

	Silava Abdurrahman da zanayîş ke Cîhane tena Vakur û Rojhelatê Sûrîye de nê, her çar hetê Kurdistanî û Rojhelatê Mîyanênî de veng da û va: “Ez reya bîne keye û hevalanê Şehîd Cîhane rê sersaxî wazena. Mi 2017ine de newe dest pêkerdbî. A zî newe Vakur ra ameybî. Mi senîn ke a dî, vindertişê aye fehm kerd. Cinîyêka bi ceserat bî. Bi moral bî. Bi kelecanêko gird xeberan taqîb kerdêne. Mi va werrekna ez zî sey aye bîne. Her tim piştîdayîş da mi. Sey dibistanêke bî. Ez zaf çî aye ra musaya.”

	 

	‘Zaf vîrardişê ma est ê’

	 

	Silava Abdurrahman wina dewam kerd: “Zaf vîrardişê ma est ê. Ma pêro şîyîne xebate. Ma pê dir xeberan viraştêne. Tu zirarê aye kesî rê çin bî. Çîyê weşan her kesî rê musnayene. Tutêke hetê babîyê xo ra amebî astengkerdiş, nêşîyîne dibistane. Cîhane şîye babîyê ci îqna kerd. Tute sipasîya xo aye rê kerd û va ez pîl bibî ez wazena bibî sey to.”

	 

	‘Bi îrade û cesaretê xo meydanan de bî’

	 

	Silava Abdurrahman dîyar kerd ke Cîhan Bîlgîn bi cesaretêk gird hêrişanê hemverê Vakur û Rojhelatê Sûrîye raya pêroyî rê neql kerdêne û wina va: “Waştêne her çî vecîyo meydan û pare bikero. Ça de xebate estbî, Cîhane uca de bî. Tu çî aye rê asteng nêbî. Ma çiqas Cîhane bivajê zî ma kêm manenê.”

	 

	‘Cîhane mohrê xo da her cayî ro’

	 

	Silava Abdurrahman wina peynîya qiseykerdişê xo ard: “Xeyalê Cîhan Bîlgîne yê tewr gird dîyayîşê Rayberê Şarê Kurdî Abdullah Ocalan bî. Tîya bi şew û roje semedê heqîqetî xebitîyayîne. Reyan bi şewe saetanê 3-4î de xebitîyayîne. Cuye bibî çim û qelema şarî. Cîhane mohrê xo da her cayî ro. Ma do xeyalanê aye bidê ciwîyayîş. Wa aye rehet rakewo. A do her tim zerrîya ma de biciwîyo.”