Elfazî Toral

 

STENBOL - Rojnamegere Serpîl Unal dîyar kerd ke averşîyayîşê peyîn yê Tirkîya dir çapemenî ziwanê ‘terorî’ de israr kena û va: “Çapemenî hetê aştîye nê, eksê ci ziwanêko şîdet gur kena, şuxilnena. Ziwanêk ke netewa kurdî bêheq kena, têkoşîn çin kena şuxilnena. No ziwan paştdayîş nêdano prosesî. Eksê ci proses asteng keno, qedêneno. Ganî no ziwan werte ra bêro wedaritiş.”

 

Çapemenîya terefgire prosesê pozîtîf yan zî negatîfî de ziwanêk hetê şarî nê, yê îqtîdarî şuxilnena. Prosesê pêrodayîşê bi serran de çapemenî serê têgehê ‘terorî’ ziwanêk bêtêduştî şuxilna. Rojnamegere Serpîl Unal derheqê babete de qisey kerd.

 

‘Wezîfeyo ke keweno milê ma ser mojnayîşê raştî yo’

 

Serpîl Unal wina qalê hêzê çapemenîye kerd: “Îqtîdar çi biwazo komelî rê mojneno. Xeberan de reklam, progandayê goreyê îqtîdarî şuxilneno. Îqtîdar û sermaye çi biwazo ê çî empozeyê komelî keno. Kurdistan, Sûriye û Ukrayna de şer dewam keno. Çapemenî kam ci hetî nêzdîyê xo bîvîno, ê beriknena. Ziwanêk hêrişî gur keno, şuxilnena. La ma rojnamegerî do her tim raştî vejê vernîya şarî. Ma wezîfeyê xo bi înat û israr bica anê.”

 

‘Ma raştî çapemenîya azade de vînenê’

 

Serpîl Unal wina dewam kerd: “Îqtîdar komelî teşwîqê şîdet û dişminî keno. Îqtîdar şaran çimsûr, hêrişkar û terorîst mojneno. Tirkîya de hemverê kurdan û elewîyan ziwanêk bêtêduştî şuxilneno. Nê  empozeyê şarî keno. Kes nê ferq nêkeno la nê zîhnê ma de bica keno. Ma raştîyan çapemenîya azade de vînenê. Nê semedî ra ganî ma bi cipersayîşêk averşîyayîşan taqîb bikerê.”

 

‘Ziwanê çapemenî şîdet gur keno’

 

Serpîl Unal va ke çapemenî ziwanêk mîlîtarîzm şuxilnena û va: “Heta çapemenî destê îqtîdar û sermaye de bo, vurnayîş zî zehmet o. Ganî fek ziwanê mîlîtarîzmî bêro veradayîş. Ziwanê çapemenî şîdet gur keno. Ganî çapemenî ziwanêk hetê aştîye bişuxilno. Prosesêk aştî est o la çapemenî ziwanê îqtîdar û sermayê şuxilnena. No zî çi heyf proses asteng keno.”

 

‘Ganî no ziwan werte ra bêro wedaritiş’

 

Serpîl Unal tewr peyîn wina va: “Heta destê ma ra bêro ganî ma raştîyan bimojnê û na babete de xeberan viraznê. Hemverê rojnamegerî de hêrişêk est o. Hemverê rojnamegeranê cinîyan zî hêrişêk cîya est o. Hemverê nê hêriş û şîdetî de ganî ma ziwano raşt bişuxilnê. Ganî ma gamê ke paştdayîş danê, bierzê.”