MERKEZÊ XEBERAN- Belgeyî ke 4 nuqtayan ra yenê pê û Rayberê Şarê Kurdî Abdullah Ocalanî seba fesihkerdiş û çekronayîşê PKK’yî pêşkêşê Kongreya PKK’yî ya 12. kerdbî, ameyê weşanayene.

 

Rayberê Şarê Kurdî Abdullah Ocalanî 27ê sibate de vengdayîşê ‘Aştî û Komelo Demokratîkî’ kerd. Vengdayîşî de dîyar keno ke PKK’yî êdî emrê xo temam kerdo û wina vano: “Seke Partî û cemîyetî ke estbîyayîşê înan bi zor nêameyo qedênayene, eşkenê bi zerrîwazî seba ke dewlet û komelî reyde bibê parçeyêk, kongreya xo bikerê û qerar bigîrê. Ganî heme grûbî çekan ronê û PKK xo fesih bikera.

 

Vengdayîşê Rayberê Şarê Kurdî Abdullah Ocalanî ser o PKK’yî mabênê 5 û 7ê gulane de Kongreya xo 12. kom kerd û qerar da ke xo fesih biko û şuxilnayîşê çekî vindarno. Rayberê Şarê Kurdî Abdullah Ocalan zî seba ke pêşkêşê kongreya PKK’yî biko, 25ê nîsane û 27ê nîsane de 2 belgeyê cîyayî amade kerdê. Rojnameyê Serxwebûnî zî hûmara xo ya 521. qeraran rê aqitnaye û belgeyê tarîxî weşanayê. Rayberê Şarê Kurdî Abdullah Ocalan seba ke PKK xo fesih bika û çekan rona, belgeyî ke 4 nuqtayan ra yenê, pêşkêşê kongre kerd. Nê belgeyî bingeyê qeraranê tarîxî yê PKK’yî awan kenê.

 

Belgeyî ke 4 nuqtayan ra yenê pê û Abdullah Ocalan pêşkêşê kongre kerdê wina yê:

 

Ma kewenê destpêkê serdemêko tarîxî

 

“Hemrayê erjîyayeyî!

 

Tarîxê têkoşînê ma 52 serrî û 1 aşme û 1 hewte xo ra pey verda û bi hewayêko fermî qedîya. Ma serdemêko tarîxî xo ra pey verdanê. Bi manayêka şênber; ma wazenî ke Sosyalîzmo bi amancê Netewe-Dewlete ra vîyarê Sosyalîzmê Komelo Demokratîk. Bi nê vîyartişî ma wazenê dest bi serdemêko newe bikerê. Senî ke peynîya heme çî û destpêkê ci est o. No serdem bi 4 sebeban ganî apey de bimano.

 

1- PKK bi hewayêko cewherî emrê xo temam kerdo. Nê semedî ra ganî bi fermî xo fesih bikera. Bi nê çîyî qesto ke yeno kerdene, sosyalîzmo-reel sebebanê xomîyanî ra rijîya û rayîrêko bîn ê sosyalîzmî lazim o. Na rewşe naskerdişê nasnameyê kurd û xo temamkerdişî ya.

 

2- Têkoşînê şerê çekdarî bi amancê stratejîyê Netewe-Dewlete bi. Nê amancî ra vejîyayîş û vîyartişê programê komelo demokratîk, sîyaseto demokratîk û huqûqî wazeno. Nê semedî ra ganî têkoşînê çekdarî ra fek veradîyo. Ganî hemverê yewbînan de sîyaseto demokratîk nas bikerê û ewleyîya huqûqî ya pêroyî û zexm xo saz bikerê.

 

3- Heme pêvînayîş û dîyalogî ke nameyê PKK’yî ser o dewlete reyde ameyêne kerdene, seba ke nêameyêne qebulkerdene, lazim bi ke qerarê fesihkerdişî bêro girewtene. Raya pêroyî zî ver çiman de ameye girewtene û ma resayî nê encamî.

 

4- Seba ke ma vîyarê serdemêko tarîxî yê; “Aştî û Komelo Demokratîkî” bibê, na gamêka hewce ya. Na paradîgma hem hetî tedeyîyan ra û hem zî hetê formî de alternatîfê serdemo yewin o. Nê semedî ra qerarî ke derheqê komelo demokratîk, sîyasetê ci û têkilîya huqûqî de bêrê girewtene, asta tarîxî de yê. Ez naye ra bawer kena û serkewtişî wazena.

 

Merdimîye de Îsrar Sosyalîzmî de Îsrar o

 

Sosyalîzmê Netewe-Dewlete Binfîneno;

 

Sosyalîzmê Komelo Demokratîk beno serkewtişî.

 

27 Nîsana 2025

 

Abdullah OCALAN