RIHA - Keyeyê cangorîyan û tepişteyan bale antî nê ser ke hema zî dewlete cewabê venga "Aştî û Komelê Demokratîkî" yê Rayberê Şarê Kurdî Abdullah Ocalanî yê 27ê Sibate de kerdo de tu gamê biçim nêeştê û waştî ke gamê lazimî bêrê eştiş. Eynî wextî de vatî: “Ma komelê azad de aştîye wazenê."

 

Merdimê şehîdan û tepişteyan vatî, ganî tepişteyê ke zîndanan de yê bêrê veradayîş û Rayberê Şarê Kurdî Abdullah Ocalan tewr lez wextî de bêro veradayîş, eynî wextî de dîyar kerdî ke ê dewlete ra semedo ke gaman nêerzena bawer nêkenê.

 

‘Ma tu gamêke nêdîya’

 

Emîne Yaşar dîyar kerd ke ganî tepişteyî bêrê veradayîş û va, “Ma bi kelecan paweyê aştîye bî, la ê zûran kenê, ma nêeşkenê tu gamê biçim semedê aştî bivînê. Tepişteyê ma zîndanan de pûç benê. Ma wazenê ke Rayberê ma Apo û pêro tepişteyê ma bêrê veradayîş. No heqaret rûmetê merdiman rê yo. Do heta key dewam bikero? Ma bi serran o nê zulmî vînenê. Ma binê dewletêk barbare de yê. Ma va, aştî, aştî, ê goş nêdanê çîyêk. No têgêrayîşêk raşt nîyo.”

 

'Ê aştîye anê ziwan la çîyêk nêkenê'

 

Dayîka Aştiye Îslîm Demîr zî wina va: "Ma bi serran o xoverdayîşê xo yê semedê aştîye dewam kenê. Ê bi vatiş vanê aştî, la zerrî ra çîyêk nêkenê. Ma wazenê ke pêro tepişteyê ma yê zîndan de yê bêrê veradayîş, êdî bes o. Ganî çi lazim bo, bêro kerdiş. Ma nêeşkenê bawerîya xo bi çîyêk ke dewlete vana bîyarê. Ma wazenê ke rayberê ma azad bibo û mîyanê ma de bibo. Ma wazenê ke na rewşe de pêro tepişteyê ma yê zîndan de yê bêrê veradayîş.”

 

'Ma bedelê pîlî dayî la ma fek aştîye ra vera nêdanê’

 

Dayîka Aştiyê Emîne Korkmaz, dîyar kerd ke di tutê aye şehîd bîyê û yew tutê aye nika sax o û va: "Ma terefgirê aştîye yê. Ma wazenê gerîlayê ma yê ke ko de yê agêrê verê ma. Ma nêwazenê êdî tu dayîkî bibermê. Ma aştîye wazenê. Bes o, ma zaf şehîd da. Lajê mi Abdullah û Mehmet şehîd bî û lajê min o bîn Yavuz nika sax o. Ma wazenê şer peynî bibo. Ma nêzana her di lajê mi sax ê, yan dinyaya xo bedelnayê. Cenaze zî nêdayî ma. "

 

'Ma êdî nêwazenê bibermê'

 

Dayika Aştiyê Adalet Çay, va ke înan bedelê giranî dayî û va: "Vengdayîşê mi semedê pêro beşê ke nê prosesî de est ê. Ma bîyê rincan la ma aştîye de israr kenê. Ma nêwazenê ke tu dayîkêke bibermo. Wa vera çekan vilî û gulî abibê, wa no zulm vindero. Sey dayîkêke, ma heta nika bermayî, ma êdî nêwazenê bibermê. Ma rayîrşîyayîşê Amedî de zî dîyar kerd ke ma her cayî de aştîye wazenê. Ma semedê cuyêka bi rûmet têkoşîn kenê. Ma nêwazenê bibê tepişte, yan kole, ma wazenê komelêk azad de bi erjê xo biciwîyê."