Şehrîban Aslan 

 

AMED - Avûkata Komeleya Vernê de Cinî û Tutî Seyhan Karasu bale ant serê polîtîkayê hukmatî yê derheqê cinîyan û dîyarkerdişê "Serra Keyeyî" û va: "Çi kenê wa bikerê ma do vajê nê û ma do bi rêxistinî xo ver bidê."

 

Reaksîyonê rêxistinê cinîyan yê hemverê polîtîkayê "Serra Keyeyî" ke serê cuya fîzîkî ya cinîyan ameyê awankerdiş roj bi roje zêde benê. Îlankerdişê serrê 2026-2036ine hetê Serekkomar Tayyip Erdoganî ra sey "Serra Keyeyî" ya cinîyan mojneno ke no qerar ê keyeyêk nîyo, no hêrişê hemverê bedenê cinîyan o.

 

Avûkata Komeleya Vernê de Cinî û Tutî Seyhan Karasu derheqê polîtîkayê hukmatî de ajansê ma JINNEWS'î rê qisey kerd. 

 

Hedef girewtişê bedenê cinîyan o

 

Seyhan Karasu na serre tewr zêde zextî cinîyan ser o bîyê û va: "No tesaduf nîyo. Ganî ê hem krîzo ke ê kewtê û hem zî krîzo ke înan welat kerdo mîyanê cîyayî nêro erjnayîş. Ganî no tena sey îlanêk sembolîk nêro vînayîş. No eynî wextî de destpêkê ablûqakerdişê zaf-qatî hemverê cinî, tut, LGBT û karkeran bî. Sazgehê keyeyî û heyetê sîyasetê nifûsî ke bi serre keyeyî ame awankerdiş, sey hacetêk ke  armanc kerdêne ke beden û cuya cinîyan dîsîplîn bikero, dest bi xebate kerd. Bêşik, no nê dir sînordar nêbî, dewam kerd."

 

'Bedelê ci giran o'

 

Seyhan Karasu dîyar kerd ke cinî hemverê îradeyê kolektîf ê tewr pîlî yê welatî yê û hemverê nê de têkoşînêk pîl yeno dayîş. Seyhan Karasu, bale ant serê nê raştî ke cinî keye, kuçe, dadgehe, dibistan û kar de wayîrê rêxistinbîyayîşêk pîl û muxalefetêk pîl ê û va: "Ê zî nê çî ra zaf aciz benê. Çi kenê wa bikerê, ma vanê nê û ma do dewam bikerê vajê nê. Ma zanê ke hêzê ma çiqas pîl o. Ma eynî wextî de zanê ke bedelê ci giran o.”

 

'Ganî sîyasetmedarî ma dir rayîr ra şêrê'

 

Seyhan Karasu, dîyar kerd ke Tirkîya de cinî raştê her tewir tedayî yenê û va: "Mercê cuya xoser yê cinî, hema vaje werte ra wuştê. Tam nê mercan de keye ancî yeno pîrozkerdiş. Semedo ke dewlete û sermaye hewl danê ke barê nê rijnayîşê ekonomî mîyanê keyeyî de, bi keda cinîyan, rayîr ra berê. Na nuqta de ma hêvî kenê ke sîyasetmedarî zî ma dir rayîr ra şêrê û bi şîdet vajê nê, seke ma vanê nê."