MERKEZÊ XEBERAN - Festîvala Cinî ya Sakîne Cansiz ya 12. do 28ê hezîrane de Zurîch de bi babeta rêxistinîya cinî û piştgirîya kulturî bêra kerdene.

 

Festîvala Cinî ya Sakîne Cansiz ke seba awankerdoxanê PKK’yî ra yewe Sakîne Cansiz (Sara) her serre yena kerdene, emserr reya 12. yena kerdene. Festîval do şaristanê Zurîch ê Swîsre de 28ê hezîrane de qada Kasernenarealî de bêra organîzekerdene û bi sloganî ‘Bi Jin jîyan azadî ma rêxistinîya demokratîke awan kenê’ do cinî bêrê têhet.

 

Yewîya Cinîyanê Kurdan ê Swîsreyî (YJK-S) do pêşengîya festîvale bikera û xeylê sazîyê cinîyan do ci rê hemkarîye bikerê. Amadekarîyê seba festîvale dewam kenê.

 

6 meclîs, 5 komun û 5 înîsîyatîfê girêdayeyî YJK-S’yî seferberî îlan kerde û beşêko pîl ê amadekarî qedênaya.

 

Cinî herêmî ke tede yê, keyeyan û dikandaran zîyaret kenê, vilawekan vila kenê û vengdanê ke beşdarê festîvale bibê. Reyna partîyanê sîyasî û sazîyanê cinîyan ê Swîsreyî zîyaret kenê û seba piştgirîya festîvale vengdayîş yeno kerdene.

 

Hunermendî ke do emserr sehne bigîrî zî dîyar bîyî. Hunermend Sasa Serap, Jala, Zerîfa Zerrîn, Gulan, Silav Rojava, Awazê Mîtra û Koma Erbanî ke girêdayeyê Têgêrayîşê Kulturî yê Mizgîn do hunerê xo pêşkêş bikerî. Reyna grûba dansî ya cinîyan û Grûba Govendanê Kurdkî ya Swîsreyî do reng bidê festîvale. Sey her serre do konê dengbêjanê cinîyan zî bêrê ronayene.

 

Seba gedeyan do qadê kayî û standê Zarok Ma zî est bî. Reyna seba merdimî festîvale zîyaret bikerê, standê werdî û agahdarkerdişî yê sazîyanê cinîyan zî bêrê ronayene.