MERKEZÊ XEBERAN - Goreyê dayeyê ÎSÎG’î, aşma gulane de tewr tay 177 karkeran dinyaya xo bedelnayî.

 

Goreyê dayeyê Meclîsê Weşîye Karkeran û Asayîşê Karî (ÎSÎG), aşma gulane de tewr tay 177 karkeran Tirkîya de dinyaya xo bedelnayî. Goreyê raporî; panc aşmê ewilî yê serre de bi pêroyî 796 karkeran dinyaya xo bedelnayî. Tewr zêde zî karkerê ke karê înşaetî, ramitişî û sektorê xizmetî de dinyaya xo bedelnayî. 

 

ÎSÎG’î da zanayîş karkerê ke dinyaya xo bedelnayî 6 ci ra tutî û 7 zî multecî yê. Bi dewamî ame dîyarkerdiş ke se ra 95ê karkeran dinyaya xo bedelnayî, sendîkaya înan çin a. Bajarê ke tewr zêde karkeran cînayetê karî de dinyaya xo bedelnayê sey Stenbol, Aydin, Mûgla û Sakarya ameyî eşkerakerdiş.