AMED - Dimayê vengdayîşê Rayberê Şarê Kurdî Abdullah Ocalanî proses ame destpêkerdiş de hema îqtîdar gamêke nêeşto. Endama Heyetê Îdareyê Komeleya Heqê Merdiman (ÎHD) Emîne Ozer va: “PKK’yî bi veradayîşê çekan cewab da. Nika dore îqtîdarî ya. Ganî lezkî gamî bêrê eştiş.”

 

Rayberê Şarê Kurdî Abdullah Ocalanî 27ê Sibate de vengdayîşê ‘aştî û komelê demokratîkî’ kerd û prosesêk newe dest pêkerd. PKK’yî 1ê adare de adirbest îlan kerd û dima ra zî 5-7ê gulane de 12ine kongreya xo pê ard û qerarê feshkerdişê 12ê gulane de pare kerd. Nika paweyê gamêke do îqtîdar bierzo yê.

 

Endama Heyetê Îdarekarî ya Komeleya Heqê Merdiman (ÎHD) Emîne Ozer derheqê prosesî de qisey kerd.

 

‘Hema gamê somutî nêameyê eştiş’

 

Emîne Ozer dîyar kerd ke pêwa ke aşmî derbaz bîyê muzakere yew hetî ra beno û va: “Bi aşman verê bi vengdayîşê Devlet Bahçelî dir proses ame destpêkerdiş. Ma hemîne dir hêvî awan bî. Vengdayîşê Abdullah Ocalanî ser o PKK’yî kongreya xo kerd û çek da ro. No cewabêk bi. La hema dewlete gamêke nêeşta. Semedê prosesê verênan bêbawerîyêke zî est a. Tepişteyê nêweşî est ê la hema tu çîyêk nêameyo kerdiş. Zemînêk qanûnî çin o. Semedo ke pêro girêdayê rayeyê serokomarî yê.”

 

‘Semedê tepişteyanê nêweşan tu sebeb çin o’

 

Emîne Ozer dîyar kerd ke hema gamê somutî nêameyê eştiş û va: “Derheqê qeyûmê ke ameyê tayînkerdiş de hema çîyêk çin o. Îradeyê şarî hema yeno xespkerdiş. Pêwa qerarê tahlîyeyê DMME’yî hema sîyasetmedarê kurdî Selahattîn Demîrtaş û Fîgen Yuksekdag tepişte yê. Veng bidê. Ganî rayîrêk destûrê bingehîn û qanûnî, qanûnê efûyî bêro taqîbkerdiş. La hema têgêrayîşêk çin o. Tepişteyê nêweşî nêeşkenê bibê bahaneyê tu çîyêk.”

 

‘Semedê aştî erey nîyo’

 

Emîne Ozer tewr peyîn wina va: “Ganî ma berprisyarîyê xo pîya bîyarê ca. Sewbîna çareyê ma çin o. Ganî ma proses pîya çareser bikerê. Semedê aştî tu wext erey nîyo. Do rojêke çareser bibo. Wextê ma yo ke ma vînî bikerê çin o. Sey cinîyêke ez dejê dayîkan baş fam kena. Ma wazenê no proses bi aştî tacîdar bo.”