AMED - Tîyatroyê Şaristanî yê Şaredarîya Amedî ya Şaristanê Girdî (DBŞT), 20-25ê Hezîrane de Rojanê Tîyatroyî yê Gedeyan ê Gêreyoxî do organîze bikero.

 

Hetê Serekîya Daîreya Karanê Kultur û Komelkî ra seba gedeyanê qezayanê dewan û taxan ke bi zehmetî resenê çalakîyanê kultur û hunerî, Rojê Tîyatroyî yê Gedeyan ê Gêreyoxî yê dîyinî 20ê Hezîrane dest pê kenê.

 

Rojê Tîyatroyî yê Gedeyan ê Gêreyoxî yê verênî 2019î de ameybî kerdene û badê tayînkerdişê qeyyûmî nêameybî kerdene. Na çarçewe de Îstanbul, Wan û Amed ra 3 grûbê jonglor (hunerê sîrkî) û 6 grûbê tîyatroyî, bi kayanê xo yê Kurmancî û Zazakî yê Kurdî gedeyan reyde do bêrê têhet.

 

Rojanê Tîyatroyî de; Tîyatroyê Şaristanî yê Amedî, ŞanoWan, Merkezê Hunerî yê Gedeyan, Tiyatroba, Golge Sahne, Nisk Huner; kayê “Mirza û Keybanu”, “Vewremerdim”, “Nisko”, “Daristana me”, “Hirço û Mozmozik” û “Sê Ezezok” do sahne bigîrê.

 

Kayê tîyatroyî 13 qezayan de do bêrê sahnekerdene

 

Akerdîş 20ê Hezîrane saet 20:00 de Sumerpark de bi beşdarîya grûbanê jonglor Mordem Sanat, Mavi Mask, Sosyal Oyun Sokakta (SOS) reyde dest pê keno. Rojê Tîyatroyî 5 rojan dewam keno û qezayanê Gêl, Licê, Karaz, Pîran, Pasûr, Çêrmûge, Şankûş, Bismil, Çinar, Hêni, Erxenî, Hezro û Farqîn dewam keno. Kayê tîyatroyî her roje 3 qezayanê cîyayan de parkan de saete 19:00î de do bêrê sahnekerdene.