Melîke Aydin

 

ÎZMÎR - Yew xoverdayoxa Dîgel Tekstîlî, Buşra Gungor dîyar kerd ke ganî kargerîyan de cinî xo birêxistin bikerê, bibê sendîka û va: “Cinîyê diganî bi zor yenê xebitnayîş û destdergî înan rê yeno kerdiş. Ma derheqê nê caardişan de rapor amade bikerê û eşkera bikerê.”

 

Karkerê Tekstîlê Dîgelî yê fîrmayê Almanî yo û herêma Serbestî ya Egeyî ya Gazîemîrî ya Îzmîrî de semedo ke bî sendîka, kar ra ameyî eştiş. Xoverdayîşê karkeran 6 aşmî yo dewam keno. Se ra 85ê karkerê tekstîlî cinî yê. Xeylê ci ra cinî 15 karkerî bi kodê 49 kar ra ameyî eştiş. Karkerî aşma çeleyî ra yo xo ver danê. La 12ê hezîrane de 8 karkerê bînî zî kar ra ameyî eştiş. Almanya pêwa karkerê bi sendîka xebityena, semedo ke Tirkîya de hêzê karî erjan o û bêsendîka karkeran xebitnena,  Tirkîya de fabrîqa akerd.

 

Yew serkêşa nê xoverdayîşî Buşra Gungor a û Buşra Gungor dîyar kerd ke vera şikdarê desteştişî yê bi kodê 44 karî ra bêrê dûrvistiş, bi hawayêko bêhuqûqî aye bi Kodê 49 kar ra ameya vetiş. Buşra Gungor dîyar kerd ke ê do derheqê mobîng û desteştişî de dosya amade bikerê û weşan bikerê. Buşra Gungor venga pêro cinîyan da ke hêzê xo ferq bikerê û bibê sendîkayij.

 

‘Şertê xirab yê karî û heqdesto kêm’

 

Buşra Gungor dîyar kerd ke bi heqdestê kêmî xebitênê û se ra 30 zem waştê la nêameyo qebûlkerdiş û va: “Şertê ma nêameyî başkerdiş. Nê semedî ra ma bî sendîkayij. Ma zext û mobîngî dir ameyî rî bi rî. Karo ke ez kena baldarî wazeno la ez nêeşkeya bikerî û mi va ez beşêk bînî de ca bigîrî la waştişê mi nêame ca. Ma bi hûmare şuxilênê. Tuwalet û molayan ra birnayîne. 420 karkeran ra se ra 85 cinî bî. Bi pêroyî 8 tuwalet estbî. Roje de di rey pakkerdêne. Klozetî xeylê xo şikite bî. Dimayê pandemî werd xira bi. Cayo ke ma ci de şuxilênê toz o. Ganî ma her roje do bişiminê. La di, hîrê rojan ra reyke vejîyayîne.”

 

‘Zabitname nêgirewtî kar ra vetî’

 

Buşra Gungor dîyar kerd ke vernîya ke zabitname bigîrê, kar ra ameyê eştiş û va: “Semedê cuyêka merdimayî ez kewta nê rayîrî. Ez sendîka hevalanê xo ra musaya û ez bîya endam. Şîrketî hemverê nê de dewa akerd. Ma paweyê netîce yê. Heta ke heqê ma bêrê dayîş, ma tîya yê. Ganî cinî hêzê xo bivînê û bibê sendîka. Fabrîqeyan de cinî sey hêzê karî yê erjan yenê vînayîş û yenê şuxilnayîş. Cinî yenê pelçiqnayîş û mobîng yeno kerdiş. Cinîyê diganî bi zor yenê şuxilnayîş û desteştiş înan rê yeno kerdiş. Ma derheqê nê caardişan de rapor amade bikerê û eşkera bikerê. Ma cinî mecburê şertê xirabî nîyê. Ganî tewr zêde cinî xo birêxistin bikerê.”