MÊRDÎN - Mêrdîn de demê peyîn merdişê bişik yê cinîyan zêde bî û avûkate Berîvan Orhan, dîyar kerd ke merdişê şikin ser o cipersayîşê bi tesîr nînê kerdiş û dîyar kerd ke ganî nêzdîbîyayîşê hemverê nê dewan bivuryo.

 

Polîtîkayê hukmatî rayîr ver fail û kiştoxan akeno û her roje hûmara kiştişê cinîyan zêde bena. Kiştiş, tacîz, tecawiz, întîxar û şîdet, netîceya nê polîtîkayê îqtîdarî pê yenê. Kiştox, faîl û kerdoxî polîtîkayê bêcezayîşî ra feyde gênê. Eynî wextî de demê hûmara întîxarî û merdişê bişik Mêrdînî zêde bî. 

 

Hevmsereka Komeleya Huqûqnasê Semedê Azadîye (OHD) ê Mêrdînî Berîvan Orhan, derheqê babete de ajansê ma JINNEWS'î rê qisey kerd.

 

Berîvan Orhan, dîyar kerd ke mîyanê rojêke de 3 cinî bişik dinyaya xo bedelnayî û va: "Bi taybetî nika medya de merdişê bişik ê Leyla Işiktaş û Muhater Işiktaş est o. Sereyê ewilê ra heta ewro ma sey OHD nêzdî ra taqîb kenê. Hîn ajansê xeberan û kanalê TV yê xeberan zî merdişê her di cinîyan bişik nêvîneno û vano yew gonî şîya mezgê aye ya bîn zî krîzê qelbî derbaz kerda. Ma nê xeberan rast nêvînenê. Semedo ke cenaze xira bibî, semedê otopsî şirawitî Nexweşxaneyê Amedî. Otopsî ewilê nika nîyo. Demê raporê otopsî dosya de bêro bicakerdiş ma do o wext bieşkê bibê wayîrê agahî." 

 

Kiştiş û întîxar

 

Berîvan Orhan, dewam de va: "Ma nê zihnîyetî qebûl nêkenê. Sewbîna ma xeylê çî zanê la semedê cipersayîşêk rasteqîn ma nêwazenê nika raya pêroyî dir pare bikerê. Mêrdîn de mîyanê serrêke de xeylêk mergê cinîyan bişik o. Çend rojî verê 3 cinî dinyaya xo bedelnaye. Leyla û Muhater wayê yewbînan ê û mergê înan bişik o. Ma sey ameyê kiştiş erjnenê. Kiştişê cinîyan wa binê nameyê întîxarî de nêrê nimitiş.”

 

'Çira aye xo kişt?'

 

Berîvan Orhan, dosyaya întîxarî ke Dêrîk de bî ser o wina va: "Cinîya ke vatî xo kişta, nêverdayî ma biewnê dosya ra. Ma bi endîşey ê semedo ke cigêrayîşêk baş nêameyo kerdiş, nêverdenê ke ma mudaxilê dosya bibê. Ma do sey Komîsyonê Cinîyan ê OHD'yî çi beno wa bibo ma do taqîbkerdoxê kiştişê cinîyan, mergê bişik ê cinîyan bî. Failî îmkan vînenê ke delîlan binimnê. Ganî nêzdîbîyayîşê hemverê dewayan bivuryo. Ganî sey dewayê întîxarî nê la sey întîxarê cinîyan û qirkerdişî bêro vînayîş. Ma nê peyîn de şahidîya întîxarî kerd ke 40 rojî pitikêke aye estbî. Dewa de babetêke estbî ke kesî munaqeşe nêkerd: Çira întîxar? Çi aye ver bi întîxarî berd? Ganî selahîyetdarê dewletê nê persan bipersê û tedbîran bigîrê."

 

'Têkoşîn pîya bikerê'

 

Berîvan Orhan bale ant şîdetê hemverê cinîyan ser û va: "Eşkerayîya çapemenîye û hewldayîşê ma yê bînî qîmî nêkenê. Na nuqta de ma venga pêro raya pêroyî û rêxistinê cinîyan kenê ke paştdayîş bidê cinîyan û vengê înan berz bikerê. Bi vengêk hempar û xeta têkoşînî awan bikerê. Ma venga pêro hevalanê xo yê cinîyan kenê ke ganî nê têkoşînî de pîya hereket bikerê. Komel bêazadîya cinîyan azad nêbeno. Ma, cinş, do cinîyan azad bikerê."