AMED- Kombîyayîşê Pêroyî yo Adetî yo 32. yê Konseya Şaristanî ya Amedî, bi rojeva awanîyanê bêplanan ê derûdorê Baxçeyê Hewselî û Pirdê Des Berinî û îşxalanê qadanê warê hemparî yê şaristanî de, 10ê Çeleyî de do bêro têhet.

 

Kombîyayîşê Pêroyî yo Adetî yo 32. yê Konseya Şaristanî ya Amedî, bi rojeva awanîyanê bêruxsetan û îşxalanê ke demê peyênî de şaristanî de zêde bîyê, 10ê Çeleyê 2026î de do bêro têhet. Bi taybetî zerarê ke awanîyanê bêplanan ke derûdorê Baxçeyê Hewselî û Pirdê Des Berinî yê tarîxî de zêde bîyê, dayê xozayê şaristanî ro, do bibo babetanê verênan ê rojeve.

 

Goreyê qerarê ke kombîyayîşê Heyetê Rêberîya Konseya Şaristanî yê 3ê Kanûne de ame girewtene, kombîyayîşê pêroyî de tena nê her di herêmî ney, eynî demî de îşxalê ke heme qadanê waranê hemparan ê şaristanî (meydan, cade, kuçe û peyarayîr) de qewmîyenê zî do bêrê rojeve.

 

Beyanato ke hetê Konseya Şaristanî ya Amedî ra ame dayene, tede bal ame antene ke Kombîyayîşê Pêroyî yo Adetî yo 32. do seba çareserkerdişê nê problemanê ke rasterast tesîrê cuya şaristanî kenê, zemînêko muhîm awan bikero. Beyanatî de wina ame vatene: “Ma şarê xo û hemparanê xo yê pêroyînan dawet kenê ke seba vernîgirewtişê awanîyanê bêkontrolan ke mîrasê tarîxî, kulturî û xozayî yê şaristanê ma tehdît kenê û îşxalanê qadanê umumîyan beşdarê prosesî bibê. Kombîyayîşê pêroyî ke do 10ê Çeleyê 2026î de bêro kerdene, do seba wayîrvejîyayîşê ameyoxê hemparî yê Amedî do bibo têhetameyîşêko krîtîk.”

 

Yeno pawitene ke qerarê ke do kombîyayîşê pêroyî de bêrê girewtene, sazgeh û rêxistinanê têkilîdaran reyde bêrê parekerdiş û pêşkêşê şarî bibê.