AMED – Keyeyê endama YJA-STAR'î Rojbîn Sonmeze ke 31ê teşrîna verêne 2025ine de herêma Qendîlî de dinyaya xo bedelnabî, semedê kênaya xo Amed de mewlîd da.

 

Merkezê Neqlkerdişî û Çapemenî ya HPG’yî 4ê Kanûne de neql kerdibi ke endama YJA-STAR'î Rojbîn Sonmez (Dilzar Rêber Andok) 31ê teşrîna verêne 2025ine de herêma Qendîlî de demê perwerdeyî de netîceya qezayêk de dinyaya xo bedelnaye. Keyeyê Rojbîn Sonmez û MEBYA-DER’ê Amedî eywanêka veyve ya qezaya Rêzanî ya Amedî de semedê Rojbîn Sonmeze yad bikerê mewlîd da. Dayîkê Aştîye, aktîvîstê TJA'yî, temsîlkarê sazgehê sivîlî yê komelî mîyan de xeylêk kesî tewrê bernameyê yadkerdişî bîyî.

 

Bernameyê yadkerdişî ke mewlîd ame wendiş, semedê heme kesê ke têkoşînê aştî û demokrasî de dinyaya xo bedelnayê deqeyêk rêz ame girewtiş û sondê çerxa şoreşê ame berzkerdiş. Dima ra zî girse sloganê “Şehîd namirin” berz kerd. Dima ra sînevîzyon ke qalê cuye û têkoşînê Rojbîn Sonmez kerdêne ame nawitiş. Dima ra bernameyê yadkerdişî peynî bî.