SOHR: Malbatên Efrînî yên li Kobanê bi krîzeke giran a mirovî re rû bi rû ne

2026-01-29 13:16:39


	 

	NAVENDA NÛÇEYAN - Saziya Çavdêriya Mafên Mirovan a Sûriyeyê (SOHR) ragihand ku malbatên bi zorê ji Efrîn a dagirkirî hatin koçberkirin, di nava şert û mercên giran ên zivistanê de bi krîzeke mirovî re rû bi rû ne.

	 

	Di daxuyaniya SOHR'e de hate gotin, bi dehan malbatên ku piştî ji Efrînê hatin koçberkirin, ji Tebqa û Reqayê jî hatin koçberkirin û ji ber êrişên dawî neçar man xwe li dibistanên li Kobanê bigirin.

	 

	SOHR'ê got, "Lê belê malbat ji ber şert û mercên giran ên zivistanê û kêmaniya pêwîstiyên bingehîn ên jiyanê bi krîzeke giran a mirovî re rû bi rû ne" û diyar kir ku li dibistanên Kobanê yên koçber lê dimînin elektrîk, av û alavên germkirinê nîne.

	 

	Daxuyaniyê bi vî rengî dewam kir: "Ji ber ku alîkariyeke xurt a mirovî ji herêmê re nayê pêşkêşkirin, trajiya malbat di nav de ne kûrtir dibe."

	 

	Di daxuyaniyê de bi taybetî işaret bi rewşa zarokan hate kirin ku ji ber sermê û mercên giran ên li derveyî mirovahiyê bi rîska giran re rû bi rû ne û banga alîkariya lezgîn hate kirin.