
Malperên wezaretên HTŞê di destê Hackerên Kurd de ne 

2026-01-27 20:07:09


	&nbsp;

	NAVENDA NÛÇEYAN - Komek Hackerên Kurd malperên wezaretên ku ji hêla HTŞê ve hatin avakirin ku êrişî Rojavayê dike, hack kirin.

	&nbsp;

	Komeke hackerên Kurd a bi navê Tîma Ş. Hevrîn Xelef Hecker malperên Wezareta Karên Hundir û Wezareta Aborî û Bazirganiya Derve ku her du jî ji hêla HTŞê ve hatine avakirin, hack kirin. Koma hackeran rûpelên wezaretên ku hackkirî, parve kirin.

	&nbsp;

	Komê di daxuyaniya xwe de diyar kir ku ev çalakî hewldanek e ji bo hesabpirsîna ji berpirsiyarên binpêkirinên mafên mirovan û komkujiyên li Rojavayê. Di daxuyaniyê de wiha hat gotin: “Sûcdarên her dilop xwîna ku li Rojavayê hatiye rijandin dê bi rêya kavilên dîjîtal ên van saziyan hesab bipirsin.” Hat gotin ku êrişên HTŞê, komên bi mejiyê DAIŞê û hêzên piştgir ên wan li dijî gelê Kurd gihîştine astên qirkirinê. Di daxuyaniyê de hat destnîşankirin ku di rewşeke ku zarok ji sermayê dimirin û jin dibin hedef de bêalîbûn tê wateya hevkariya sûc.

	&nbsp;

	Her wiha komê diyar kir ku ew torên leşkerî û siyasî yên saziyên girêdayî HTŞê dişopînin û hewldanên berhevkirina daneyan berdewam dikin. Di daxuyaniyê de wiha hat gotin: “Em ne tenê pergalên we têk dibin, di heman demê de em hemû torên we yên leşkerî û siyasî, mekanîzmayên tepeserkirinê yên Wezareta Karên Hundir û şopên danûstandinên we yên qirêj bi dewleta Tirk re bi kûrahî dişopînin.”

	&nbsp;

	Tîma Hacker a Ş. Hevrîn Xelef, di beşa bangewaziyê ya daxuyaniya xwe de bang li hackerên li çaraliyê cîhanê kir û ji wan xwest ku li hember tiştên li Rojavayê diqewimin, “Di vê têkoşîna adil de cihê xwe bigirin, êrişî binesaziya zilmê bikin û bêdeng nemînin”.

	&nbsp;

	&nbsp;