‘Heta gamê qanûnî nêrê eştiş do averşîyayîş çinî bo’ 2026-05-07 10:00:12   Devrîm Findik   STENBOL - Hemsereka DEM Partî ya Umranîye Ayten Bîngol bale ant serê kêmîyê gamanê qanûnî û somutan ê mîyanê Prosesê Aştî û Cimatê Demokratîkî û dîyar kerd ke, aştîyêka mende bi tewrbîyayîşê heme hetanê komelî û yewbînan qebûlkerdişî mumkîn a.   Munaqeşeyê derheqê prosesê Aştî û Cimatê Demokratîkî de, bi hetanê cîya-cîyayan ê komelî re hem pabebîyayîş hem zî bêbawerîye vecenê orte. Nêzelalîya derheqê prosesî de dewam kena û nêzdîbîyayîşê Tirkîya zî bi munaqeşeyê ‘meşgulkerdişî’ yeno erjayene. Pêwa nê, kêmîyê gamanê somut û mendeyan zî yenê rexnekerdiş. Waştişê heqanê têduştan ê cinîyan û kurdan, ferz keno ke polîtîkayê entegrasyonî newe ra bêrê destpêkerdiş. Na het ra Hemsereka Partîya Têduştî û Demokrasî ya Şaran (DEM Partî) ya Umranîye Ayten Bîngol qisey kerd.   ‘Ganî fikrê cîyayî bêrê yewser’   Ayten Bîngol dîyar kerd ke ganî gamê qanûnî yê derheqê prosesî de demêkê nêzdî de bêrê eştiş û va ke semedê nêeştişê gaman proses zî xetimêno. Ayten Bîngol nê çîyî ardî ziwan: “Serê nê esasî ganî gamê qanûnî bêrê eştiş. Ez wazena ke no proses agêro aştîye. Ganî ma her yew cuyêka pîya qebûl bikerê. Semedo ke qanûnê entegrasyonî ca bêrê, ganî her kes tewrê prosesî bîbo. Ganî bawerî û şarê cîyayî yewbînan qebûl bikerê û pîya ciwîyayîşî bimusê.”   ‘Tena waştişê kurdan bes nîyo’   Ayten Bîngol destnîşan kerd ke tena bi waştişê kurdan nêbeno û va: “Ganî heme komel xo tewrê prosesî bikero. Ganî her kes paştîdayîş bido prosesî. Ganî serrastkerdişê qanûnî bêrê kerdene, ganî hem tepişteyî hem zî yê ke serê koyî de yê agêrê cuya xo. Semedê nê ganî bi qanûnan rayîr bêro akerdiş. Vatişê ‘terorî’ ganî cuyê ra bêro vetene.”