‘Azadîya şarê kurdî û rayberê înan nîna muzakerekerdiş’ 

2026-10-10 12:01:48


	 

	STENBOL - Cinîyê ke semedê şermezarkerdişê Komployê Mîyanneteweyî yê 9ê teşrîna verêne ya hemverê Rayberê Şarê Kurdî Abdullah Ocalan kewtî kuçeyan, dîyar kerdî ke heqanê Şarê Kurdî û azadîya rayberê înan nêyenê muzakerekerdiş û vatî: "Heta azadîya Abdullah Ocalanî ma do kuçeyan de xo ver bidê."

	 

	Platformê Sazîyanê Demokratîkî bi sloganê "Semedê Aştî û Cimatê Demokratîkî azadî Birêz Ocalanî rê" Stenbol de, derheqê komployê 9ê teşrîna verêne de vizêrî eşkerayî da. Zaf welatijî, temsîlkarê partîyê sîyasî û rêxistinê komelê sivîlî tewrê ci bîyî.

	 

	Cinîyê ke tewrê eşkerayîye bîyî ajansê ma JINNEWSî rê qisey kerdî.

	 

	'Lazim o ke rayberê ma azad bibo'

	 

	Nûran Altintaş dîyar kerd ke kurdî, sey her şarêk, wazenê azad bibê û wina dewam kerd: "Rayberê ma semedê kurdan her çî ceribneno. Heta semedê şexsê kurdî ma îşkence dîyî. Ma wazenê sey her kesî azad biciwîyê. Nika dayîşûgirewtişî est ê. La Abdullah Ocalan lazim o ke lezêr demî de bêro veradayîş. Ma bi xêrê ci resayî na sewîya. Lazim o ke o lezêr demî de bêro veradayîş, şêro parlamento û sey rayberê kurdan problemanê kurdan çareser bikero. Dewlete Rayberê Şarê Kurdî Abdullah Ocalanî sey dişminî mojneno, bi taybetî çimanê rayepêroyîya Tirkîyayî de. Kesê îqtîdarî ey wina nîşan danê. O 27 serrî yo girawêk de zîndanî de yo. No neheqî yo. O rayberê kurdan o. Eke o zîndan ra bivejo û qisey bikero, eke merdimî ey nas bikerê, fikrê înan do bivurîyê çimkî ey nas nêkenê. Hîn tirkî est ê ke sey ma fikirîyenê. Eke o zîndan ra bivejîyo û ê ey nas bikerê, fikrê înan do bivurîyê."

	 

	

	 

	'Kurdî her cayî de pey ci de yê'

	 

	Zahîde Îlbaz wina bale ant tewrbîyayîşê xo yê eşkerayîye ser: "Ez semedê rayberê xo ameya. Lazim o ke nika ey veradê, çira nêveradanê? Ma rayîrê ci taqîb kenê. Ma aştîyêk bi rûmet wazenê. Kurdî her cayî de yê, Bakur ra bigî heta Başûr û Rojhelat, pey ci yê û pabeyê vejîyayîşê ci yê. Heme kurdî temaşe kenê û goş danê ci. Ma wazenê ke ê lezkî veradê. Her welatêk temsîlkarêk wayîr o û o temsîlkarê ma yo."

	 

	Ozlem Şeker va ke ê semedê waştişê azadîya fîzîkî ya Abdullah Ocalanî kuçeyan de yê û wina fikrê xo ard ziwan: "Şarê kurdî yeno manaya Rayberê ma. O bi serran bi nêheqî tepişte yo. Azadîya ci manaya azadîya şarê kurdî ya."

	 

	'Ma sey her kesî wayîrê heqî yê'

	 

	Demet Gumuş dîyar kerd ke Abdullah Ocalan têkoşînê Şarê Kurdî û cinîyanê kurdî dinya rê da naskerdiş û va ke azadîya ci manaya azadîya şarê kurdî dana û wina va: "Rayberê ma semedê cinîyan azadî ard. Komployê hemverê rayberê ma berardeyê faşîzmî yo. Heme dinya hemverê ci komplo kerd. O 27 serrî yo zîndanî de yo û hema zî zere de yo. Ma serê xo berz gênê; heta ke o azad nêbo, tu kesê ma azad nêbeno. Nika dayîşûgirewtişî est ê û hema zî azadîya ey ser dayîşûgirewtiş kenê. Lazim o ke ziwan û azadîya ma masaya dayîşûgirewtişî de nêbo. Ma zî sey her kesî wayîrê nê heqan ê. Ma do heta azadî pê bêro kuçeyan de bê."