Berardeyê Bostanê Bajarî yê Komunê Cinîyan ê Binevşe ameyî arêdayîş

2026-10-12 10:49:45


	 

	Neslîhan Kardaş

	 

	ŞIRNEX - Bostanê Bajarî yê Komunê Cinîyanê Binevş ke Cizîr de binê banê şaredarîye de ame akerdiş, berardişê verêne ame arêdayîş. Cinî, berardişanê xo hem çînenê hem zî roşenê.

	 

	Komîteya Îdarekarîya Herêmî ya Partîya Têduştî û Demokrasîyê Şaran (DEM Partî) esasê azadîya cinîye û temsîlkarîya têduştî de 5 bajaran sey "bajarê cinîyan" îlan kerd. Amed, Artemêr, Cizîr, Nisêbîn û Gever sey herêmê pîlotî ameyî weçînitiş. 6ê adare de Cizîr bajarê cinîyan ame îlankerdiş û zafê xebatê cinîyan na çarçewa de ameyî kerdiş. Yew nê xebatan ra Bostanê Bajarî yê Komunê Cinîyanê Binevş bî. Bostan taxe Basîskî ya girêdayeyê Cizîrî de ser wareyêk hezar û 570 metrekareyî de ame ronayîş. Cinî bi kedêke kolektîf 22ê gulane de îsot, balîcan, xiyar ronayî. Nika zî ameyîşê payîzî dir demê arêdayîşî ame û cinîyan dest bi komkerdişî kerd.

	 

	Yew xebatkara Bostanê Bajarî yê Komunê Cinîyanê Binevşe Zeynep Kuçuk (47) derheqê awankerdişê bostanî û keda ke dayî de qisey kerd.

	 

	

	 

	'Ma kolektîf xebate kenê'

	 

	Zeynep Kuçuk va ke germabîyayîşê hawayî dir bostan dayê ro û va: "Bostan binê banê şaredarîya Cizîrî de ame akerdîş. Proje semedê cinîyan bî. Ma nika tena hîrê kes tîya yê. La hûmara ma zêde ya. Ma bi kolektîf xebate kenê. Ma bostan rona û nika berardişanê xo arêdanê û roşenê. Ma piştîdayîş wazenê. Lazim o ke hîna zêde cinî tewrê ma bibê."

	 

	Zeynep Kuçuk wina dewam kerd: "Ma îsot, balîcan, bamya, xiyar, her çî çînenê. Nika ma sebze çînenê. Ma keyeyê ke hewcedarîya înan bi piştîdayîşî est ê tewrê projeyî kerd. Ma berardişanê xo semedê înan zî bênê. Ma berardişanê xo danê hevalê ke yenê serdanê ma zî. Pêwa nê ma şinê bazar û roşenê. Yê ke hewcedarîya înan est a ma semedê înan zî benê."

	 

	

	 

	'Werdê ma bêderman ê'

	 

	Zeynep Kuçuk wina qedêna: "Werdê ma bêderman ê. Ma berardişêk organîk kenê. Nê semedî ra hewcedarîya ma hîna zêde bi piştîdayîşî est a. Ma venga heme kesî danê ke bêrê berardişanê bostanê cinîyan bigîrê. Cimat de fehmêk sey cinî nêeşkenê tu çî bikerê est o. Ka tîya ra biewnîyê. No ware hetê cinîyan ra ame awankerdiş. Cinî biwazê eşkenê her çî bikerê. Ma bi xebatêk kolektîf eşkenê her çî bikerê."