Îran de çalakîyê “Sêşemeyê Dardekerdişî rê Nê” 67 hepisxanan de dewam kenê 2026-11-17 15:20:49   MERKEZÊ XEBERAN - Îran de kampanyaya “Sêşemeya Dardekerdişî rê Nê”, ke hepisxanan de vera dardekerdişî amebî destcikerdene, hewteyê 147îne de 67 hepisxanan de vila bî. Girewteyî, çarçeweya kampanya de grevê vêşanîye yê rojaneyî danê domkerdene.   Eşkerayîya kampanyayê de, kesê ke 15ê teşrîna peyêne 2019î de protestoyan de ganê xo ra bîyî, ameyî yadkerdene. Ame vatene ke hezaran kes ame destbendkerdene û tewr kêmî hezar û 500 kes ame kiştene. Eşkerayî de ame vatene ke têkoşînê seba ciwîyayîşêko seypê, azad û birûmet do dewam bikero.   Goreyê eşkerayîye, 21ê adare ra ya ke Îran de serra newe ya, 607î ra zêdeyêr girewte ameyî darvekerdene; înan ra 21 ê xo cinî yê.   Dewamê eşkerayîye de ame vatene ke Peyman Salihi, ke 9ê teşrîna peyêne de Mudirîya Îstîxbarata Tehranî de bi pirodayîş ame destbendkerdene, cenazeyê ey, ke rêçeyê îşkenceyî ser o bî, keyeya ey rê ame teslîmkerdene.   Eşkerayî de dadger Salavati rexne ame kerdene, çike ey gelek biryarê darvekerdişî dayî. Ame vatene ke gelek darvekerdiş zî bi protestoyan û piştîdayîşê komelî ame vindarnayene.   Çarçewaya kampanyaye de karkeran, rêxistinanê pîşeyî, aktîvîstanê sîyasî û civaka sivîlî rê venga dayîş ame kerdene ke vera darvekerdişî têkoşînî de cayê xo bigîrê.