AMED - Şaredarîya Peyasî bi wesîleya 3ê temmuze Roja Nêşuxilnayîşê Torbeyê Naylonî yê Dinya, semedê pawitişê xoza û kêmkerdişê lêşînîya plastîkî çalakîyêke muhîm organîze kerd.

 

Mudirîya Karê Pakitî û Mudirîya Vurnayîşê Îklîmî û Berardeyê Eşteyî pîya taxa Dîclekentî de çenteyê potikî vila kerdî ke hişyarîyêk hemverê caardişê torbeyê naylonî viraznê. Endamê meclîsê şaredarîye û xebatkarê şaredarîye zî beşdarê na çalakî bî û zîyanê torbeyê naylonî yê xoza ser o şarî rê qalî kerdî.

 

Eşkerayîya şaredarî de ame vatiş ke bazarê qezaya Peyasî serran o 78 ton çopê plastîkî yenê eştiş û hewte de 300 hezar torbeyê naylonî yenê şuxilnayîş. Na hûmare mojnena ke lêşînîya plastîkî bi taybetî qeza û bi pêroyî de welat de problemêk pîl a. Çenteyê naylonî, semedo ke xoza de zirarêk pîl danê derûdorî, herre, awe û cuya kovî, caardişê çenteyê potîkî tewr baş o. 

 

Bi na çalakîye, Şaredarîya Peyasê hewl dana ke hişmendîyê komelî berz bikero û alternatîfê ekolojîk, sey çenteyê potikî, teşwîq bikero.