MERKEZÊ XEBERAN - Nuştoxa îranije Rezîta Recaî çarçewaya cipersayîşê hetê dozgerîya Reştî ra ameya destpêkerdiş de amî destbendkerdiş, pêwa ke keyeyê aye pereyê kefaletî da zî, amî tepiştiş.

 

Nuştoxe Rezîta Recaî ke bajarê Reştî yê Îranî de ciwîyena, 19ê temmuze de dimayê ke hetê 4ine Şubeyê Dozgerîya Reştî ra venga ci dayî, uca de amî destbendkerdiş û sewqê zîndanê Lakanî yê Reştî amî kerdiş.

 

Goreyê Platformê Heqê Cinîyan, venga Rezîta Recaî dayê ke bêro dozgerî û derheqê sûcanê aye de aye  agahdar kerdê. Dozger Alî Riza Bahşîpur ke cipersayîş dayo destpêkerdiş û dimayê sûcdarkerdişî qerarê kefaletê 500 milyon tumen dayo. Labelê pêwa ke keyeyê aye eynî roje de pereyê kefaletî da zî, dadgehe nê çî qebûl nêkerd.

 

Dozgerî dimayê di rojan agahî da keye û dîyar kerd ke heta şubeyê dadgehe dem dîyar nêkero do Rezîta Recaî tepişte bimano û kefalet zî demê cipersayîşî de qebûl nêkenê.