Şehrîban Aslan

 

AMED - Rojê vîyarte de raporê ATK’yî yê derheqê Rojîn Kabaîşe de ame eşkerakerdiş. Avûkate Îrem Îlhan da zanayîş ke dosya de xeylê îhmalî est ê û va: “Dosyaya Rojîne dosyayêka rêze ra nîya. Testê dewlete yo ke berpirsîyarîyê ci yê hemverê heqê ciwîyayîşê cinîyan o.”

 

Sazgehê Tibê Edlî, raporê derheqê Rojîn Kabaîşe ke amade kerd de, DNAyê di kesan ameyî tespîtkerdiş. La nêame eşkerakerdiş ke nê DNAyî ser kam ci cayê bedenî de ameyê vînayîş. Bi israrê keyeyî û avûkatan dimayê serrêke de bi waştişê dadgehe, ATK’yî rewşe eşkera kerd. ATK’yî va ke yew DNA sîneyê Rojîn Kabaîşe ser o, yewna zî vajîna aye ser o ameyo tespîtkerdiş. Nê tespîtî dosyaya Rojîn Kabaîşe ke wayîrê cîyayîyêk krîtîk de yo, serrêke ame nimtiş. Reaksîyonê komelî yê hemverê nê zî roj bi roje zêde beno.

 

Temsîlkara Merkezê Heqanê Cinîyan ê Baroyê Amedî avûkate Îrem Îlhan ke dosya taqîb kena, derheqê dosya de qisey kerd.

 

Bale ant yewkarîya di baroyan ser 

 

Îrem Îlhan da zanayîş ke eşkerayîya hempar ê baroyan reyna mojneno ke dosya mergêko biguman a cinîyan nîya, qetilkerdiş yan zî hêrişêk cinsî ke wicdanê rayapêroyî kena eleqedar a. Îrem Îlhan wina va: “Eşkerayîya her di baroyan mesaj da ke êdî rayapêroyî û mercîyê cigêrayîşî nêeşkenê prosesî bi bêvengîye bikerê. Her di baroyan piştdayîşî xo ardî zîwan. Berpirsîyarîyê cigêrayîşêk bi bandor ke Peymana Stenbolî û CEDAVî pêşnîyaz kena ard vîr. Armancê nê îradeyê hemkarî, lezkerdişê sewîyeya cigêrayîşî û astengkerdişê sergirewtişê delîlan bî.”

 

‘Bi israr vatî întîxar o’

 

Îrem Îlhan derheqê vatişanê ke Rojîne întîxar kerda de zî wina va: “Çi heyf nê welatî de mergê biguman ê cinîyan bi întîxarî yenê girewtiş. Dosyaya Rojîne zî bi eynî şiklî bî. Roja ke Rojîne ameye vînayîş, Walîyê Wanî û Rektorê zanîngehî şîyî keyeyê Rojîne û vatî, ‘Rojîne întîxar kerd’. Bi nê şiklî fehmê întîxarî vila bî. Vera ke tu dayeyêk somut bibo vatî întîxar o. La wezîfeyê dewlete no yo ke cigêrayîşêk bi bandor bikero.”

 

Kêmî nêameyî çareserkerdiş, ameyî nimtiş, îhmalî…

 

Îrem Îlhan bale ant ser bêhuqûqîyan û wina va: “Dosya de bêhuqûqîyê tibî û huqûqî ameyî ciwîyayîş. Ereyverdayîş, komkerdişê delîlan de, ercnayîş de erey mendî. Nimtiş û îhmalî est ê. Wexto delîlî ameyî komkerdiş vatî kamerayî xirab bîyê. Rewşa normalî de ganî çi biameyîne kerdiş? Eke nê kamerayî xirab bîyê zî ganî biameyîne tespîtkerdiş û bikerdêne zabitname. La wextê dozgerê yewinî de vatê nê kamerayî xirab ê û kamerayî nêkerdî binê pawitişî. Rast o, vatê kamerayî xirab ê û kerdê dosya.”

 

‘Têkoşînê keyeyî hişmendî viraşt’

 

Îrem Îlhan bale ant ser DNAyanê ke ameyî vînayîş û nê va: “Bedenê Rojîne ser o DNAyî ameyî vînayîş. La rapor de kam ci cayê bedenî de ameyî dîyayîş, nêame eşkerakerdiş. No îhmalêk gird o. Tibê Edlî nê erey vist. Heta ma derheqê nê de muracatê sûcî kerd. Keye serrêke yo têkoşîn keno. No têkoşîn hişmendîyêk viraşt. Keyeyî hemverê bêvengkerdişî de têkoşînê heqîqetî keno. Na xoverdayîş mojneno ke mergê cinîyan qeder nîyo, polîtîk o. Dosyaya Rojîne dosyayêka rêze ra nîya. Testê dewlete yo ke berpirsîyarîya ci yê hemverê heqê ciwîyayîşê cinîyan o.”