EDENE - Rayîrşîyayîşê KESK’î yê roja hîrêne de dewam keno, resa Edene. Hemsereka Şubeyê SES’î ya Edeneyî Şukran Guzel va ke heta ke her kes agêro karê xo ser, ma do têkoşîn bikerê.

 

Konfederasyonê Sendîkayê Kedkarên ê Îstîmlakî (KESK) hemverê bêhuqûqîyê KHKyan bi vatişê “Ma do karê xo peyser bigîrê” 13ê teşrîna verênê de Amed ra ver bi Anqara dest bi rayîrşîyayîş kerd. Rayîrşîyayîş roja hîrêne de dewam keno û raywanî resayî Edene. Raywanî Edeneyî de hetê temsîlkar û endamanê sazgehê ke girêdayê KESK’î, rêxistina DEM Partîya Edeneyî, sazgehê komelî û xeylê kesan ra vernîya Meydanê Îstasyonî de ameyî pêşwazîkerdiş. Girse tîya de govende kerd.

 

Girse dima ra heta Parka Ataturkî rayîr ra şi. Rayîrşîyayîş de vatişê “Bicîwîyo Xoverdayîşê Kedkaran û do KHK’yî şêrê ma do bimanê” ameyî berzkirdiş. Girse wexto ke resa Parka Ataturkî, eşkerayî ame dayîş. Eşkerayî hetê Hemsereka Şubeyê SESî ya Edeneyî Şukran Guzele ra ame wendiş.

 

Şukran Guzele va ke ewro ma semedê kesanê ke semedê bêhuqûqî kar ra ameyî dûrvistiş tîya yê û wina va: “10 serran de, xeylê kesî karê xo ra dûr ameyî vistiş. Vengê xeylê kesan ame qutkerdiş. Ma destpêk ra va; KHK zilm o. Bi hezaran kesî karê xo ra dûr ameyî vistiş. Ma zanê ke qerarê KHK’yan sîyasî bî. Heta ke her kes agêro karê xo ser, ma do têkoşîn bikerê.”

 

Dima ra Hemserekê Pêroyî yê KESKî Ahmet Karagoz qisey kerd û va ke ma semedê KESKijanê ke karê xo ra ameyî dûrvistiş rayîrşîyayîş kenê û wina va: “Serra 2016î ra qeyûm tayînê îradeyê şarî yeno kerdiş. Wan de Abdullah Zeydan, Edene de Zeydan Karalar wezîfeyê xo ra ame dûrvistiş. Wexto ke ma karê xo ra ameyî dûrvistiş vatî, ‘têkilîyê înan terorî dir est o’. Têkilîyê ma kamî dir est o? Têkilîyê ma bi şaredarîyê ke qeyûm ameyî tayînkerdiş, şarê ke heqanê xo ra ameyî binpêkerdiş dir est o. Têkilîyê îqtîdarî zî bi kesanê ke heqê şarî binpay kerdî dir est o. Ma do xo ver bidê.”

 

Pey eşkerayîye raywanî ver bi Mêrsînî kewtî rayîr.