MÛŞ - Cenazeya Gulcan Budak ke demê qedexeyê Cizîrî de dinyaya xo bedelnabî, bajarê aye qezaya Kopî de ameye definkerdiş. Cendirmeyan nêverda ke wecîbeyê dînî bêrê caardiş û qeymeqamtî zî keyeyê şînî keyeyî rê qedexe kerd. 

 

Gulcan Budak (Gulan), 11ê sibate serra 2016ine de demê qedexeyê vejîyayîşê kuçeyan ê qezaya Cizîrî ya Şirnexî de pêrodayîş de dinyaya xo bedelnaye. Cenazeya Gulcan Budak, vizêrî goristanê bêkesan ê qezaya Sêweregî ya Rihayî de amî girewtiş. Keye, cenazeya kênaya xo girewt û ver bi qezaya Kopî ya Mûşî de kewt rayîr.

 

Cenaze, ardî dewa Mollakentî ya qezaya Kopî û tîya de bi girseyî ameye pêşwazîkerdiş. Demê girse waştêne wecîbeyê dînî camî de bica bîyaro, cendirmeyan destûr nêda. Nê ser de, keyeyî cenaze berd keye û wecîbeyê dînî keye de bica ard. Dima ra zî cenazeya Gulcan Budake goristanê dewe de ameye definkerdiş. Endamê keyeyî, îdarekarê DBP, DEM Partî, MEBYA-DER û xeylêk welatijî tewrê merasîmê definkerdişê cenazeye bî. 

 

Demê definkerdişê cenaze de dekewtiş û vejîyayîşê goristanî hetê cendirmeyan ra ame girewtiş. Fermanê qeymeqamê qeza, destûr nêame dayîş ke keye şînê xo keyeyê şînî yê dewe de rono. Nê ser de keyeyî qerar da ke şînê xo keye de rono. Şîno ke ewro ame ronayîş, do hîrê rojî dewam bikero.