NAVENDA NÛÇEYAN - Di daxuyanî û çalakiyên li bajarên Serhadê de, banga rakirina dorpêça li ser Kobanî, rawestandina êrîşan û avakirina jiyaneke azad û demokratîk hat kirin.

 

Li Colemêrg, Agirî û Wanê jî li dijî êrîşên çeteyên HTŞ'ê yên li ser Rojava daxuyanî û çalakî hatin lidarxistin.

 

Colemêrg

 

Li Colemêrgê , pêkhateyên Platforma Ked û Demokrasiyê li kêleka abîdeyê li navenda bajêr civîneke çapemeniyê li dar xistin da ku êrîşên çeteyên HTŞ'ê yên li ser Rojava protesto bikin. Gelek kes beşdarî civîna çapemeniyê bûn.

 

Tahir Tekinalp, berdevkê niha yê Konfederasyona Sendîkayên Karmendên Giştî (KESK), li ser navê platformê daxuyanî xwend.

 

Agirî

 

Li navçeya Bazîdê ya Agiriyê li dijî êrîşên li ser Rojava meşek û civîneke çapemeniyê hat lidarxistin. Beriya meşê, li navçeyê rewşa awarte bi awayekî fermî hat ragihandin. Kolana ku ofîsa navçeya DEM Partiyê lê ye bi tevahî bi bariyeran hat girtin û leşker û polîs li pişt wan bicih bûn. Kesên ku dixwestin ji bo civîna çapemeniyê nêzîkî ofîsa partiyê bibin, hatin astengkirin û gel di bin dorpêçê de meşiya.

 

Girseyê, dema ku gihîşt Kolana Cumhuriyetê, daxuyaniyek da û daxwaza rawestandina êrîşan kir.

 

Wan

 

Platforma Saziyên Demokratîk a Wanê (DEKUP) derbarê kuştina Baran Abdî yê ji Kobanî de, ku duh li Tarsûsa Mersînê ji balkona xwe xwepêşandana li dijî êrîşên HTŞ'ê yên li ser Rojava temaşe dikir, hat kuştin daxuyaniyek çapemeniyê da. Di dema daxuyaniyê de, ku li Kolana Sanatê pêk hat, pankartên bi nivîsa "Qatilê zarokên Kurd, yê Baran Abdî, DAIŞ'a nijadperest û zîhniyeta faşîst e" hatin hildan. Gelek caran dirûşmeyên wekî "Bijî berxwedana Rojava", "Qatil DAIŞ, hevkar AKP" û "Şehîd namirin" hatin berzkirin. Endamên Meclîsa Dayikên Aştiyê yên Wanê, çalakvanên Tevgera Jinên Azad (TJA), parlamenterên Wanê yên Partiya Wekhevî û Demokrasiyê ya Gelan (DEM Partî), rêxistinên girseyî yên demokratîk û gelek kesên din beşdarî daxuyaniya çapemeniyê bûn.

 

'Em li gel Rastiya Rojava ne'

 

Hevşaredarê Şaredariya Bajarê Mezin a Wanê Abdullah Zeydan, ku şûna wî qeyûmekî ji aliyê hikûmetê ve hatibû tayînkirin, di civîna çapemeniyê de axivî û got, "Bila her kes bizanibe ku Rojava ji bo me xeta sor e. Ger hûn difikirin ku hûn dikarin Kurdan qir bikin, ger hûn difikirin ku Rojava dê li ber we serî bitewîne, hûn şaş in. Tavilê dev ji vê komployê berdin û dev ji siyaseta xwe ya qirêj berdin."

 

Civîna çapemeniyê bi dirûşmeyan bi dawî bû.