NAVENDA NÛÇEYAN - Lêkolînera Çavdêriya Mafên Mirovan Ferîşte Abbasî, bang li welatên Yekîtiya Ewropayê kir ku ji rewakirina Talîbanê dûr bisekinin û di bin şert û mercên heyî de vegera bi zorê ya penaberên Afganî rawestînin.

 

Lêkolînera Çavdêriya Mafên Mirovan Ferîşte Abbasî, beriya serdana şandeyeke Talîbanê ya Brukselê bike, bang li welatên endam ên Yekîtiya Ewropayê kir. Di banga xwe de dibêje ku beriya her tiştê di têkiliyên xwe yên bi Talîbanê re rewşa mafên mirovan li Afganistanê, bi taybetî mafên jin û keçan, bidin pêş.

 

Ferîşte li ser hesabê xwe yê X ragihand ku wî berî serdana şandeya Talîbanê li Brukselê hevdîtinên parêzvaniyê temam kirine. Ferîşte Abbasî rexne li hewldanên hin welatên Ewropî yên ji bo çêkirina peymanên koçberiyê bi Talîbanê re kir û ev rêbaz wekî "pir dilşikestî" bi nav kir, di demekê de ku welatiyên Afganî hîn jî bi zextek giran û qedexeyên berfireh re rû bi rû ne.

 

Lêkolînera mafên mirovan tekez kir ku divê penaberên Afganî bi zorê neyên vegerandin û divê hikûmetên Ewropî di biryarên xwe de parastina mafên mirovan û bi taybetî mafên jin û keçên Afganî, li ber çavan bigirin.

 

Ev gotinên Abbasî di demekê de hatin ku vexwendina nûnerên Talîbanê bo Brukselê ji aliyê hin çalakvanên mafên mirovan û parêzvanên mafên jinan ve bi nerazîbûnê hat pêşwazîkirin. Rexnegir dibêjin ku her têkiliyeke fermî bi Talîbanê re, bêyî ku rewşa mafên mirovan li Afganistanê were berçavgirtin, dikare rêxistinê rewa bike.

 

Li gorî agahiyan, Yekîtiya Ewropayê plan dike ku bi nûnerên Talîbanê re li ser koçberî û vegera penaberên Afganî nîqaş bike. Lêbelê, li gorî rêxistinên mafên mirovan, ev gav divê bi hesabê paşguhkirina sînordarkirinên berfireh ên li ser jin û keçên Afganî neyê.