STENBOL – Sekretera Pêroyî ya KCDP’yî Şîrîn Yalincakoglu da zanayîş ke zêdebîyayîşê kiştişê cinîyan û mergê gumanbar yê cinîyan tesaduf nîyo û va: “Bi nimitişê dayeyê rastî vernîgirewtişê kiştişî nêbeno. Bi caardişê 6284 eşkeno vernîya qetilkerdişan bêro girewtiş.”

 

Kiştişê cinîyan û mergê gumanbar yê cinîyan her şino zêde benê. Cinî pêwa qerarê pawitiş û dûrvistişî zî hetê gumanbaran ra yenê kiştiş.

 

Sekretera Pêroyî ya Platformê Ma do Kiştişê Cinîyan Vindarnê (KCDP) Şîrîn Yalincakoglu derheqê tabloyê bîyaye de qisey kerd.

 

‘Qanûnê 6284 pê nîno’

 

Şîrîn Yalincakoglu dîyar kerd ke serra peyîn kiştiş û mergê gumanbar yê cinîyan zêde bîyê û wina ard ziwan: “No tesaduf nîyo. Cinî muracatê polîsan kenê labelê qanûn bi tesîr pê nînê. Cinî şîdet vînenê muracat kenê. Labelê çi heyf qanûno 6284 bi tesîr pê nîno. Yew sebebo bîn yê zêdebîyayîşê kiştişî qelsîyê sewîyeya cipersayîşî de yo. Ma mergê gumanbar de her tim nê vînenê; cayê mendê de camêrd est o. Verê tehdîd kerdo, hêriş kerdo. Cinî gerre kerda labelê tu çîyê derheqê gumanbar de nêameyo kerdiş. Qerarê dûrvistişî est o û no qîm nêkeno. Semedê cinîyê gerre kenê qanûno 6284 nîno vatene. Cinî heqê xo nêzanê. Cinî vanê eger ma bizanayîne ez do cîya têbigêrayîne.”

 

‘Polîtîkaya bêcezakerdişî cesaret dana gumanbaran’

 

Şîrîn Yalincakoglu wina ard ziwan: “Heqê cinîyan yeno binpaykerdiş. Sere de emniyet bin pay kenê. Cesaret danê gumanbaran. Semedê tedbîr nînê girewtiş gumanbar bi rehetî têgêrenê. Cinî yenê kiştiş. Cinî keye, kuçeyan, nêweşxaneyan, wareyê îstîmlakî û her cayî de bi eşkera yenê kiştiş. Bi nimitişê dayeyê rastî vernîya kiştişî nîna girewtiş. Bi caardişê 6284 eşkeno vernîya kiştişî bêro girewtiş. Dayeyê wezarete rastîye nîşan nêdanê. Hûmara bîyaye ya wezaretî eşkera kena hîn zêdeyêr a. Dewlete mecbur a qanûnê 6284 pê bîyaro. Ganî Peymana Stenbolî zî agêrê. Sûcdar cinî nîyê, mekanîzmayê pawitişê ke bica nêyenê yê. Zêdebîyayîşê şîdetê cinîyan, kiştişî ser o netîceya ke dewlete berpirsiyariyê xo nêana ca ya.”

 

Şîrîn Yalincakoglu bale ant şîdetê cimatî de her şino zêde beno ser û wina ard ziwan: “Ma cinî do hemverê nê prosesî û vatişan de bê. Ma nêeşkenê şîdetî nêvîyaye bêrê. Her cayê dinya de şîdet cinîyan ser o est o. Oyo ke vernîya şîdetî bigîro têgêrayîşê cinîyan o.”