WAN - Endama Akademîya Jîneolojîye Eylem Akti muhîmîyê prosesî yê hetê azadîya cinîyan ra û mesajê peyêne yê Rayberê Şarê Kurdî Abdullah Ocalanî ercna û wina va: “Cinîyan her wareyê cuya komelî de semedê ke bîyayîşê xo bidê mojnayîş, berê demêk neweyî akerdî. Ganî cinî maseyanê aştîyê de ca bigîrê.”

 

Rayberê Şarê Kurdî Abdullah Ocalan 27ê sibata 2025ine de prosesê “Aştî û komelê demokratîkî” dest pêkerd û prosesê yew serre pey xo de verda û proses ke azadîya cinîyan keno merkezê xo, cimatê demokratîkî hedef gêno. Ame dîyarkerdiş ke cinî seranserê tarîxî de bîyî hêzê awankerdoxî yê cimat û aştîye û semedê awankerdişê cimatê demokratîkî girewtişê rolê çalakî yê cinîyan qonaxêk muhîm o.

 

Endama Akademîya Jîneolojîyî Eylem Akti bale ant prosesî û Awankerdişê Cinîyan ya ke prosesê aştî û cimatê demokratîkî de ameya weşankerdiş ercna.

 

‘Ma paradîgmaya Birêz Ocalanî ra îlham gênê’

 

Eylem Akti va ke Abdullah Ocalan mesajê xo de cinîyan tena sey mexduran nêgîno dest, sey hêza awankerdoxî ya cimatî gêno û paradîgmaya azadîya cinîyan, demokrasî û ekolojîye esas gêno. Eylem Akti wina dewam kerd: “Cinî mesajan de sey merkez ca gênê. Abdullah Ocalan mesajê 27ê sibatî de û manîfestoyê xo de cayêk taybet dano cinîyan. Ma her di mesajê Birêz Ocalanî de no vînenê. Cinî tena hetêk komelî nîyê, yewser sey merkez yenê girewtiş. Ma Birêz Ocalanî ra îlham gênê.”

 

‘Çimeyê şorişê cinîyan: Têkoşînê cinîyan o’

 

Eylem Akti va ke seranserê tarîxî de cinî prosesanê şerî û aştîyê de yê tewr zaf yenê mexdurkerdiş ê û wina va: “Têkoşînê cinîyan zî na rastîye ra vecîno. Qetilkerdiş, desteştiş û şîdetê cinîyan ser o têkoşînê rêxistinkerdeyê cinîyan pîl kerd. Oyo ke ma berd şorişê cinîyan na rastî ya. Paradîgmaya azadîya cinîyanê Abdullah Ocalanî hemverê qirkerdişê cinîyan, modelêk cimatî yê alternatîf pêşkêş keno. Ma têkoşînê xo esasê na paradîgmayî de domnenê.”

 

‘Cinî hêzê cimatî yê rêxistinkerdeyî ya’

 

Eylem Akti dewam kerd û wina va: “Prosesê aştî û cimatê demokratîk eynî wextî de prosesê entegrasyonî yo. Ganî cinî aktîf tewrê prosesî bibê. Ganî cinî vengê xo bi hawayêk xurt vejê. Ganî rêxistinbîyayîşê xo bikerê. Rêxistinbîyayîş, meclîsê cinîyan, xebatê TJA û Jîneolojîyê nê hetî de muhîm ê. Ganî cinî komelî rê serkêşî bikerê. Polîtîkayê bêcezaverdayîşî yê dewayan ke qetilkerdiş û şîdetê cinîyan ser o dewam kenê, dom kenê. Gumanbarî bi bêcezaverdayîşî yenê xelatkerdiş. Ganî qanûnî esasê azadîya cinîyan de bêrê serrastkerdiş û vejîyayîşî. Şerê Rojhelatê Mîyanênî her şino giranêr beno. Cinîyan her wareyê cuya cimatî de semedê ke bîyayîşê xo bidê mojnayîş, berê demêk neweyî akerdî. Ganî Rojhelatê Mîyanênî de cinî maseyanê aştîyê de ca bigîrê.​​​​​​​​​​​​​​​​“