Gulîstan Gulmuş

 

RIHA - Birazîya Rayberê Şarê Kurdî Abdullah Ocalanî, Berfîn Ocalan da zanayîş ke ganî şert û mercê azadîya Abdullah Ocalanî bêrê bicaardiş û va: “Ma serekîya xo kîşte xo de wazenê. Ma wazenê tecrîd peynî bibo û pêro tepişteyî azad bê.”

 

Serê vengdayîşê Aştî û Cimatê Demokratîk ke Rayberê Şarê Kurd Abdullah Ocalanî 27ê Sibate 2025ine de kerd, yew serre vîyart. Vengdayîşî ser o PKK’yî ra xeylêk gamî ameyî eştiş la hema dewlete gamêka somut nêeşta. Derheqê prosesî de sererastkerdişêk qanûnî çin o û muxatabê prosesî Abdullah Ocalan hema binê tecrîdî de yo.

 

Birazîya Rayberê Şarê Kurdî Abdullah Ocalanî, Berfîn Ocalan ke reya yewine pêvînayîşê 31ê teşrîna verêne 2025ine de Abdullah Ocalanî dî, derheqê tecrîdo ke dewam keno de ajansê ma re qisey kerd.

 

‘Ma wazenê her tim bivînê’

 

Berfîn Ocalan bale ant proseso ke Abdullah Ocalanî dest pêkerdo û da zanayîş ke pêwa prosesî tecrîd dewam keno û wina dewam kerd: “Serek 27ê Sibate 2025ine de venga Aştî û Cimatê Demokratîkî kerd û nê ser o proses ame destpêkerdiş. Serrêke zêdeyêr prosesî ser de vîyart. Dewlete proses de gamêka somut nêeşta. Sererastkerdişêk qanûnî nêkerd. Pêvînayîşê keyeyî bisînor ê. Ma nê prosesî de waştişê pêvînayîşan kenê. Reya yewine ez 31ê teşrîna verêne de şîya pêvînayîş. Ma sey keye bi hêvî bî. Hêvîya ma estbî ke aştî pê bêro. Ma bî şahidê nê yewî. Ma zaf kelecan bî. Ma wazenê her tim serekê xo bivînê.”

 

‘Wa serek kîşte ma de bo’

 

Berfîn Ocalan dewam de dîyar kerd ke ganî azadîya fîzîkî ya Rayberê Şarê Kurdî Abdullah Ocalanî lezkî bêro kerdiş û wina dewam kerd: “Ma kîşte xo de wazenê. Ma azadîya fîzîkî wazenê. Ma wazenê tecrîd peynî bibo û tepişteyî azad bê. Proseso ke Birêz Abdullah Ocalanî dest pêkerdo eke bi serkewtiş netîce bibo, do semedê pêro dinya bibo hêvîya roşnî.”