STENBOL - Dayîkanê Şemeyî hewteyê 1102ine de aqûbetê Husamettîn Yaman û Soner Gulî ke verê 34 serran amebî vînîkerdiş persayî û veng dayî dozgeran û vatî: “Dosyaya Husamettîn Yaman û Soner Gulî de cipersayîşêk xurt bikerê û heqîqetî vejê orte.”

 

Dayîkanê Şemeyî yan zî Merdimanê Şemeyî bi waştişê “Wa vînîbîyayeyî bêrê vînayîş, failî bêrê muhakemekerdiş” hewteyê 1102ine de Wareyê Galatasarayî de çalakîya xo ya hewtine viraşt. Dayîkanê Şemeyî, Hemserekê Pêroyî yê ÎHD’yî Cîhan Aydin û Oya Ersoy, endam û îdarekarê ÎHD’yî yê Stenbolî û xeylê pawitoxê heqanê merdiman beşdarê çalakîye bîyî. Çalakîye de fotografê vînîbîyayeyan û Dayîkanê Şemîye ke wefat kerdê, ameyî berzkerdiş. Hewteyê 1102ine de aqûbetê Husamettîn Yaman û Soner Gulî ke verê 34 serran amebî destbendkerdiş û vînîkerdiş persayî û failê înan persayî.

 

Metnû eşkerayîye hetê kênaya Fehmî Tosunî ke vînî yo, Besna Tosune ra ame wendene.

 

‘Her wext cewabo negatîf dayî înan’

 

Besna Tosune dîyar kerd ke vera polîtîkayanê înkarî cewabo tewr pîl vîrardene û qalkerdişê hîkayeya merdimanê ke ameyê vînîkerdiş o û wina va: “Bi nê munasibetî, merdimê ke nêwazenê ameyox mîyanê tarîtîye de bimano, pawitoxê heqîqetî yê. Ma hewteyê 1102ine de wendekaranê zanîngehe Husamettîn Yaman û Soner Gulî ke verê 34 serran ameyî vînîkerdiş, anê xo vîr. Husamettîn Yaman 22 serrî û wendekarê Zanîngeha Stenbolî bi. Bi bahaneyê ke ‘pankart berz kerdo’ amebi tewqîfkerdiş û dimayê 15 rojan 6ê êlule 1990ine de amebi veradayîş. Soner Gul zî 21 serre û wendekarê Fakulteya Tibî ya Cerrahpaşa bi. Soner Gul endamê Komeleya Wendekaran bi, nê munasibetî ra zî xeylê rey amebi destbendkerdiş û îşkence ci rê amebi kerdiş. Husamettîn Yaman 2ê Gulana 1992an de wexto ke keyeyê xo ra vecîya, dimayê 2 rojan 4ê Gulane de kesêk birayê Husamettînî rê têlêfon kerdo û vato, ‘Husamettîn û Soner Gul ameyê destbendkerdiş. Cuya înan tehlîke de ya, muracatê emnîyetî bikerê’. Keyeyê Yaman û Gulî muracatê Midûrîyê Stenbolî û sazîyanê bînan ê dewlete kerd. Labelê cewabê ‘mîyanê destbendan de nîyê’ dayî înan.”

 

‘Cipersayîşêko xurt nêame kerdene’

 

Besna Tosune destnîşan kerd ke 19ê Kanûna serra 2011an de beyanatê îtirafkarê bi nameyê Ayhan Çarkinî ke polîso verên bi, mîyanê rayaumûmî de ameyî parekerdiş û va: “Ayhan Çarkinî vatibi ‘Husamettîn Yaman û Soner Gul ma destbend kerdî, daristanêk de ma ê înfaz kerdî’. Dimayê nê îtirafî keyeyê Yamanî reyna muracatê sazîyan kerd û waşt ke dosyaya înan newe ra bêra akerdiş. Labelê pêwa îtirafanê Ayhan Çarkinî zî cipersayîşêko bi tesîr û xurt nêame kerdene. Ma ewro reyna veng danê dozgeran; dosyaya Husamettîn Yaman û Soner Gulî de cipersayîşêko xurt bikerê û heqîqetî vejê orte. Çend serrî vîyareno wa vîyaro, ma do aqûbetê vînîbîyayeyan pers bikerê. Siba Roja Dayîkan a. Bi na wesîle dayîkê ke aqûbetê tutanê xo hema nêmusayî û wefat kerdî, ma şexsê Saffet Yamane de bi hurmet anê xo vîr. Çîyo ke na bêvengîye vurnaye, xoverdayîşê heqîqetî yo.”

 

‘Ez hewnê xo de zî pabeyê lajê xo ya’

 

Dima ra Dayîka Şemeyî Hanîfe Yildize qisey kerd û dîyar kerd ke 31 serrî yo lajê xo Murat Yildizî gêrena û va: “Ez hewnanê xo de zî pabeyê lajê xo ya. 60 roşanan ra zêde yo bêlajê xo roşan pîroz kena. Siba do dayîkî şêrê mezelanê tutanê xo ser û tutî do şêrê mezelanê dayîkanê xo ser, labelê ez nêeşkena şêra cayêk.”

 

Çalakî bi ronayîşê qerenfîlanê wareyê Galatasarayî qedîyaye.