AMED- DFG’yî serrgêra 29. de rojnameger Gurbetelî Ersoze arde vîrî. DFG’yî vat ke mîrasê Ersoze yo tewr muhîm taqîbkerdişê heqîqetî, girdkerdişê vengê cinîyan û dewamkerdişê têkoşînê çapemenîya azade yo.

 

Gurbetelî Ersoz pêşenganê çapemenîya azade û rojnamegerîya cinîyan ra yew bîye. Ersoze 8ê teşrîna verêne ya 1997î de Qadanê Pawitişê Medya de, Herêma Federale ya Kurdîstanî de, pêkewtişêk de şehîd bîye. Komeleya Rojnamegeran a Dîcle Firat (DFG) serrgêra 29. de Ersoze bi eşkerayîyêka nuştekîye arde vîrî.

 

DFG’yî eşkerayî de dîyar kerd ke Ersoze sey rojnamegera pêşenge tarîxî de ca girewte. Goreyê DFG’yî, aye estbîyayîşê cinîyan warê rojnamegerîye de xurt kerd û têkoşînê azadîya cinîyan bi warê çapemenîye ra girê da. Eşkerayî de wina ame vatene: “Aye wezîfeyê mudirîya weşanî ya pêroyî kerd û sînoranê fehmê medyaya serdeste ya camêrdan rijna. Aye mojna ke cinî medya de tena xebatkar nîyê; eşkenê bibê rayber û qeraran zî bidê.”

 

Ame dîyarkerdene ke 2014 de rojnamegeranê cinîyan ê kurdan 8ê teşrîna verêne sey Roja Rojnamegeranê Cinîyan ê Kurdan îlan kerd. Na, nîşananê tewr xurtan ê wayîrvejîyayîşê mîrasê Ersoze ra yew bîye. DFG’yî wina vat: “Ewro bi hezaran rojnamegerê cinî mîrasê Gurbetelî dewr genê û vengê xo medya de gird kenê. Cinî qadanê medya de berpirsîyarîyanê aktîfan genê xo ser; heqîqetî dima şonê û çîyê ke nêyenê dîyayene, anê ver çiman.”

 

Gurbetelî Ersoze rayîrêk akerd; rojnamegerê cinî yê kurdan nika nê rayîrî hîna hîra kenê. Goreyê DFG’yî, ajansê xeberan ê cinîyan, beşê cinîyan ê ajansanê pêroyîyan, televîzyon, rojname û qadê dîjîtalî yê cinîyan pêro nê mîrasî rê nimuneyê ganî yê. Rojnamegerê cinî waranê xo yê vatiş û xeberviraştişî zêde kenê. Vera fehmê medyaya serdeste ya camêrdan zî pratîkê rojnamegerîya alternatîfe xurt kenê.

 

DFG’yî eşkerayîya xo wina qedênaye: “Mîrasê Gurbetelî yo tewr muhîm taqîbkerdişê heqîqetî, girdkerdişê vengê cinîyan û dest nêverdayîşê têkoşînê çapemenîya azade yo. Sey Komeleya Rojnamegeran a Dîcle Firat, ma serrgêra 29. ya koçkerdişê aye de Gurbetelî Ersoze bi rêz, hezkerdiş û hesretî anê xo vîrî.