NAVENDA NÛÇEYAN - 13 sendîka û rêxistinên navneteweyî ji bo cîbicîkirina “Mafê hêviyê” yê Abdullah Ocalan, bang li Komîteya Wezîran kirin. 

 

Komîteya Wezîran a Konseya Ewropayê dê di 15-17’ê Îlonê de civîna xwe li dar bixe û “Mafê hêviyê” yê Rêberê Gelê Kurd Abdullah Ocalan bigire rojeva xwe. Gelek sendîka û rêxistinên ji Bask, Katalonya, Galîçya û herêmên cuda yên Spanyayê, têkildarî mijarê ji Serokê Komîteya Wezîran a Konseya Ewropayê lan Borg re nameyek şandin. 

 

Di nameya hevpar de Tirkiye hate rexnekirin û hat gotin ku biryarên Dadgeha Mafên Mirovan a Ewropayê (DMME) yên têkildarî “Mafê Hêviyê” bicih nayîne. Bang li Komîteya Wezîran hate kirin ku li hemberî Tirkiyeyê bi lez gavan biavêje.

 

Di nameyê de îşaret bi biryara Adara 2014'an a DMME ya têkildarî doza Abdullah Ocalan / Tirkiye (No.2) hate kirin û hate bibîrxistin ku dadgehê tespîta wê yekê kir, cezayê girtîgehê yê heta bi hetayê yê girankirî yê bêyî derfetê berdana bi şert binpêkirina Xala 3'emîn a Peymana Mafên Mirovan a Ewropayê ye û bang li Tirkiyeyê kir ku reformên qanûnî yên pêwîst bike.

 

Di nameyê de her wiha hate bibîrxistin ku di civînên Îlona 2024'an de ji bo bicihanîna biryaran salek dem ji Tirkiyeyê re hate dayin û hate gotin ku Enqereyê di plana çalakiyê ya nû de ku pêşkêş kir, ragihand ku Abdullah Ocalan jî di nav de wê “mafê hêviyê” ji bo hikûmxwarên cezayê muebbeda girankirî lê hatiye birîn derbas nebe û ev nêzîkatiya Enqereyê bi tundî hate rexnekirin. Di nameyê de hate destnîşankirin ku ev helwest li dijî biryarên DMME'yê ye.

 

Sendîka û rêxistinan diyar kirin ku Tirkiye weke endamekî Konseya Ewropayê û namzetê Yekitiya Ewropayê mecbûr e ku berpirsyariyên xwe bi cih bîne û bang li Komîteya Wezîran kirin ku li gorî biryarên xwe yên civîna Îlona 2024'an tavilê bikeve nava liv û tevgerê.

 

Di nameyê de hate ragihandin ku bicihanîna “mafê hêviyê” ji bo pêvajoya aştî û demokratîkbûnê ya li Tirkiyeyê krîtîk e. Her wiha îşaret bi banga Abdullah Ocalan a 27’ê Sibata 2025’an a ji bo fesixkirina PKK'ê û bêçekbûnê hate kirin û hate destnîşankirin ku ev gav hem ji bo demokratîkbûna Tirkiyeyê hem jî ji bo çareseriya siyasî ya pirsgirêka Kurd girîng e.

 

Sendîka û rêxistinên name îmzekirin ev in: 

 

* OSTA - Aragón (Rêxistina Sendîkaya Karkeran a Aragonê)

 

* LAB - País Vasco (Langile Abertzaleen Batzordeak) (Komîteyên Karkerên Welatparêz ên Welatê Baskê)

 

* Intersindical Solidària - Valencia (Konfederasyona Sendîkayên Piştevaniyê ya Valenciayê)

 

* ELA - País Vasco (Eusko Langileen Alkartasuna) (Piştevaniya Karkeran a Baskê)

 

*CUT - Aragón (Colectivo Unitario de Trabajadores) (Kolektîfa Karkerên Yekbûyî ya Aragonê)

 

* IAC - Catalunya (Intersindical Alternativa de Catalunya) (Konfederasyona Sendîkayên Alternatîf ên Katalonyayê)

 

* CSI - Asturias (Corriente Sindical de Izquierda) (Herikîna Sendîkayî ya Çep a Asturiasê)

 

* CIG - Galicia (Confederación Intersindical Galega) (Konfederasyona Sendîkayan a Galiçyayê)

 

* ESK - País Vasco (Euskal Sindikatua Konfederazioa) (Konfederasyona Sendîkayên Welatê Baskê)

 

* CGT Burgos (Confederación General del Trabajo) (Şaxa Burogsê, Konfederasyona Karker a Giştî)

 

* Colombia Humana - Madrid (Kolombiya Mirovî - Madrid)

 

* RAM - Madrid (Red de Apoyo Mutuo) (Tora Alîkariya Beramber - Madrid)

 

* Confederación Intersindical (Konfederasyona Sendîkayan)