AMED - Derheqê 4 rojnamegerê ke beşdarê eşkerayîya derheqê qetilkerdişê rojnameger Nazim Daştan û Cîhan Bîlgîne bîyî, cipersayîş ame akerdiş û semedê îfadeyî venga înan dîya.

 

20ê kanûne de Amed de semedê rojnameger Nazim Daştan û Cîhan Bîlgîne yê ke 19ê kanûna 2024ine de Vakur û Rojhelatê Sûrîye de hetê Tirkîya ra bi SÎHA’yî ameyî qetilkerdiş, eşkerayîye amî dayîş. 4 rojnamegerê ke beşdarî eşkerayîye bîyî semedê îfadeyî venga înan dîya. 

 

Şubeyê Asayîşî yê Mudurîyê Emniyetî yê Amedî semedê îfadeyî venga Hemserekê Komeleya Rojnamegeran ê Dîcle Firatî (DFG) Selman Çîçek, mûxabîra Ajansê Mezopotamyaye (MA) Heval Onkol û rojnamegere Dîlan Kartal û Hêvîdar Onvere kerd. Derheqê rojnamegeran de bi îdiayê “Muxalefetê hemverê Qanûnê Hûmara 2911” cipersayîş ame destpêkerdiş. 

 

Rojnameger Selman Çîçek û Heval Onkol çarçewaya cipersayîşî de îfade dayî û ame zanayîş ke rojnamegere Dîlan Kartal û Hêvîdar Onver zî do siba îfade bidê. 

 

Rojnamegerê ke îfade dayî, dîyar kerdî ke înan semedê rojnamegerê ke ameyê qetilkerdiş eşkerayîye dayî û no zî heqê înan ê qanûnî yo.