MÊRDÎN- Do siba roniştişê rojnamegera tepişteye Oznur Degere bêro kerdiş û Oznûr Degere va: “Ez vera qiseyanê cinsperestan ê polîsê Asayîşê Mêrdînî vejîyaya coka semedê nasnameyê xo yê cinîtîye bi operasyonê qesasî tepişîyaya.”

 

Rojnamegere Oznur Deger Zîndanê Erzînganî de tepişîyena. Îdîanameyê vera Oznure de rojnamegerî Nazim Daştan û Cîhan Bîlgîn sey ‘endamanê rêxistine’ pênase benê, fotografê birayê aye Abdulselam Deger (Kendal Qoser) zî sey sûcî hesibîyeno. Roniştişê dewaya vera Oznure siba yo. Wina pawîyeno ke Komeleya Rojnamegeran ê Cinîyan a Mezopotamya (MKG), Komeleya Rojnamegeran a Dîcle-Firatî (DFG), Komeleya Heqanê Merdiman (ÎHD) û Komeleya Huqûqnasan a Seba Azadîye (OHD) dewa teqîb bikerê.

 

Mesajê Oznûr Degere

 

Oznure dewa ra verî mesajêk şawit û tede wina vat: ‘’Na dewa dewaya vera rojnameger a ke na rojnamegere wayîra tewirê cinîyan û rûmetê rojnamegerîye vejîyena. Nê wextî de şîdetê vera cinîyan zêdîyayo, tewirêko winayên elzem o. Ez vera qiseyanê cinsperestan ê polîsê Asayîşê Mêrdînî vejîyaya coka semedê nasnameyê xo yê cinîtîye bi operasyonê qesasî tepişîyaya. Na dewa dewaya pêro cinî û rojnamegeran a. 22yê gulane de ma do pîya bezreyê haştîye û azadîye ronê.”