RIHA - Hemsereka DEM Partî ya Rihaye Ayşe Surucu venga Abdullah Ocalanî ard vîr û va, şarê Riha kewt prosesê hişmendî û xo rêxistin kerdê. No bajar zaf bi erj o, wayîrê hêzê ke eşkeno xo newe bikero yo.”

 

Hemsereka DEM Partî ya Rihaye Ayşe Surucu, derheqê proseso ke dimayê vengdayîşê Abdullah Ocalanî ame kerdiş ser o erjnayîş kerd.

 

‘Bajarêk ke tarîxê merdimayî rê serkêşî keno’

 

Ayşe Surucu dîyar kerd ke Rayberê Şarê Kurdî Abdullah Ocalan pêvînayîşo ke 31ê adare de bi keyeyê xo dir kerd de bale ant serê muhîmîyê tarîxê Rihaye û wina va: “Birêz Ocalan semedê bajarê xo Riha ra va, ‘Bawerîya min ya ke do xo aver bero zaf pîl a. Tarîxê merdimayî tîya ra dest pêkerdo. Riha bajarêk tarîxî ke merdimayî rê serkêşî kerda ya. No bajarî de xebate, hewldayîş xeylêk zehmet o la eynî wextî de zaf bi erj o. Ma bawer kenê. Do fehmê xo averberdiş, wayîrê hişmendbîyayîşî û newekerdişî do no bajarî zaf aver bero.”

 

‘Merdimî verê xo danê bajaranê Rojawanî’

 

Ayşe Surucu dîyar kerd ke Riha bajarêk wayîrê bingehêk kozmopolîtêk a la koçberî şarî rê yena ferzkerdiş û wina va: “Merdimê herême semedê xebate verê xo danê bajaranê Rojawanî. La ma herême rê ewnîyenê herrêka zaf dewlemend a, Çemê Firatî est o. Dewlete vera teşwîqî verê merdiman dana bajaranê Rojawanî.”

 

‘Şuxilnayîşê tîryakî vejîyayo emrê 10 serre’

 

Ayşe Surucu dewam de wina va: “Emrê şuxilnayîşê tîryakî vejîyayo heta emrê 10 serre. Ma nifûsê Tirkîya ra ewnîyenê. Riha wayîrê nifûsê tewr ciwanî ya. La dayeyê wendiş-nuştişî kêmî yo. Şuxilnayîşê tîryakî zêde bîyo. Na polîtîkaya şerê taybetî ya. Ma do derheqê nê de xebatanê xo bikerê. Ma do keye bi keye bigêrê. Ma do şarî dir bêrê têhet û çareserî peyda bikerê.”

 

‘Wa her çîyêk ma kurdkî bo’

 

Ayşe Surucu bale ant serê polîtîkayê asîmîlasyonî yê kurdkî ser û wina va: “Ma do hemverê nê polîtîkayan têkoşînê xo dewam bikerê. Ma do no wext hîna zêde ziwanî ser o vinderê. Ma wazenê ke rihayîjî bi ziwanê dayîke xo vejê vernî. Ma do semedê nê bişuxilîyê. Ma do her cayî de bi kurdkî qisey bikerê.”