AMED- Dayîka Rozerîn Çukur, Fahriye Çukur ke tewrê konferansê 'Rayîrê ver bi aştîye: Vîr û Edalet' ke hetê Komeleya Heqê Merdiman (ÎHD) ra amebî organîzekerdiş bî, dîyar kerd ke aye wazena pêro şaran ko bikerê û va: “Wexto ke mi cenazeya kênaya xo girewt û defin kerd, mi aştî waşt.”

 

Komeleya Heqê Merdiman (ÎHD) dayîkê leşker, polîs, xizmê vîndîbîyayeyan, keyeyê kesê ke qedexeyê tebervejîyayîşê teberî de dinyaya xo bedelnayî, keyeyê PKK’yî û kesê ke Qirkerdişê Roboskî de dinyaya xo bedelnayî, konferansê 'Rayîrê ver bi aştîye: Vîr û Edalet' de ardî têhet. Pêvînayîşê otelêke Yenîşehîrê Amedî de pê ame de, keyeyan, rêxistinê komelê sivîlî derheqê babete de munaqeşe kerdî.

 

Yew kesê ke tewrê komxebate bî dayîka Rozerîn Çukura 17 serrî ke Amed de qedexeyê tebervejîyayîşê kuçeyan yê mabêne 2015-2016ine de hetê tîmê taybetîyan ra amî qetilkerdiş, Fahriye Çukur bî. Fahriye Çukur dîyar kerd ke aye tim aştîye de israr kerda.

 

‘Hemverê keyeyê leşkeran de tu kînê mi çin o’

 

Fahriye Çukur dîyar kerd ke bi serran o paweyê prosesêk wina aştîye yê û va: “Tu kînê mi hemverê keyeyanê leşkeran çin o. Ez aştîye wazena. Yê ma qetilkerdî şexs nîyê, yê ke ma qetilkerdî ma baş zanê. Tuta mi bêçek bî, kênaya mi wendekar bî. Destê aye de qeleme, defter, paştîya aye de zî çente estbî.”

 

‘Bî 10 serrî yo ez venga aştîye înan rê kena’

 

Fahriye Çukur qalê îdareyê xoserî kerd û dîyar kerd ke formaya dibistane kênaya aye ra bîya û wina va: “Kênaya mi 16 serrî bî. Wendekara sinifa peyîn ya lîseyî bî. Gelo tutêka 16 serrî eşkena se bikera? Kênaya mi proses de nêame qetilkerdiş. Kênaya mi hetê polîsan ra amî qetilkerdiş. Pêwa nê ma wazenê pêrûne ko bikerê. Ma aştîye wazenê. 10 serrî yo ma venga aştîye kenê. Bêrê ma bibê yew. Ma wezîfeyê ke keweno milê mi ser bica bîyarê.”

 

‘Wexto ke mi kênaya xo defin kerd mi waştişê aştîye kerd’

 

Fahriye Çukur wina peynî ard: “10 serrî yo ma aştîye wazenê. Wa tepişteyî bêrê veradayîş. Ma ameyoxê rê biewnê. Yê ke şî xora şî. Wexto ke mi cenazeya kênaya xo girewte û defin kerd mi va aştî. Ez ewro zî eynî çî vana. Ez o her tim vajî. Kînê ma çin o. Bawer a pêro keyeyî wina fikrîyenê. Ma wazenê şarê xo ko bikerê.”