MERKEZÊ XEBERAN - Dadgeha 2yîne ya Bicaardişî yê Cezayanê Xurmabadî yê Îranî, venga Ateş Şakeremî da ke semedê cezaya 38 qemçîyan ke ci rê ameya birnayîş, nê 10 rojan de muracatê dadgehe bikero.

 

Zilmê Komara Îslamî ya Îranî ke hemverê azadîwazan û bi taybetî hemverê cinîyan de dewam keno. Wextêko ke tepişteyê zîndanê Îranî hemverê dardekerdişî de grevê vêşanî de yê, cezaya qemçîyan zî cinîyan rê yena birnayîş.

 

Ateş (Zehra) Şakeremî bi agahdarîyêk nuştekî ke Daîreyê Bicaardişî yê Dadgeha 2yîne yê Cezayanê Xurmabadî ra ameyo şirawtiş, venga ci dîya. Dadgehe waşt ke Ateş Şakeremî cezaya 38 qemçîyan ke ci rê ameya birnayîş, bianco. Na ceza netîceyê gerreyêk taybetî ke hemverê aye de ame kerdiş de dîya.

 

Dadgehe 16ê teşrîna verênê de agahî da û Ateş Şakeremî ra waşt ke mîyanê 10 rojan de semedê bicaardişê cezaya qemçîyan, muracatê dadgehe bikero.

 

Ateş Şakeremî vernê de zî reyke hetê Dadgeha Cezayanê Xurmabadî yê Hûmara 106ine ra bi 38 qemçîyan û semedê “vilakerdişê xeberanê xerîban (nashr-e akazib)” bi 51 mîlyon tûmen cezaya pereyan amebî cezakerdiş. No qerar dima ra hetê Dadgeha Îstînafî ra ameyo tesdîqkerdiş.

 

Na dewa dimayê gerreyê kesêk taybetî ameye akerdiş. Ateş (Zehra) Şakeremî, verê zî amebî tepiştiş, eynî wextî de xala Nîka Şakeremî ya ke serewedaritişê şorişî yê “Jin, Jiyan, Azadî” de amebî kiştiş.