Elfazî Toral

 

STENBOL - Avûkate Eren Keskin bale ante ser sîyasetê bêcezakerdişî û va: “Heta sîyasetê asayîşî yê zordar û radîkalî bibê şîdetê cinîyan ser do bidomîyo. Semedê nê çareserîyê aştîyane lazim o. Semedê nê ganî cinî wayîrê prosesî vecîyê.”

 

Bi sîyasetê dewlete û zihnîyetê serdest ê camêrdî şîdetê cinîyan ser dewam keno. Dewlete şîdetê camêrdî meşrû kena û bi sîyasetê bêcezakerdişî gumanbaran xelat kena. Avûkate Eren Keskin derheqê babete de qisey kerd û va, merdişê cinîyan ê gumanbaran îşkenceyêko sîstematîk o û veng da cinîyan ke sere netewênê û têkoşîn bikerê.

 

Şîdetê cinîyan ser zêde bî

 

Eren Keskin ard ziwan ke semedê ziwan, bêtêduştî û sîyasetê dewlete şîdetê cinî û tutanê qijan ser o zêde bî û va: “Demê komare ra hetanî nika ma qalê dewletêka mîlîtarîst a ke bi sîyasetê asayîşî xo domnena kenê. La 2016ine ra pey sîyasetêko çimtersnaye na cografya de meselaya qiseykerdişî ya. Şîdet sey hacet ame şuxulnayene û hetê Wezaretê Karê Zerî ra îşkence ameyo pawitiş. Netîceya meşrûkerdişê şîdetî, şîdetê cinîyan ser o zî zêde bî. Peymana Stenbolî ke amebî îmzakerdiş, peyser ame antiş, na peymane cinîyan pawitêne.”

 

Bi peyserantişê peymane ra şîdet zêde bî

 

Eren Keskin dîyar kerd ke dimayê feshkerdişê peymane şîdetê cinîyan ser zî ame meşrûkerdiş û va: “Ez bixo nê çî ciwîyaya. Dimayê antişê peymane rojêke ez texsî de bîya û şofor fehm kerde ke ez avûkat a û va ‘Hevalê mi da cinîya xo ro, nika tepişte yo, do vejîyo nê? Êdî şîdetê cinîyan ser suc nîyo nê?’ Yanî merdiman nê betalkerdişî wina fehm kerdê.”

 

‘Wazenê bi keye serdestîyê camêrdî xurt bikerê’

 

Eren Keskin va: “Zihnîyetê camêrdî nêvurîyeno. Serra vîyarte serra keyeyî ameye îlankerdene. Heme kesî zanê ke camêrdî keye de şîdet musenê. Semedê sîyasetê fermî yê dewlete keyeyî de yenê berardiş. Dewlete wazena bi keyeyî serdestîyê camêrdî xurt bikero.”

 

‘Merdişê bigumanî îşkenceyê sîstematîk ê’

 

Eren Keskîn bale ant merdişê bigumanbarî yê cinîyan û va nê merdişî îşkenceyo sîstematîk o û va: “Şîdetê cinîye ser o bi rasti nîno muhakemekerdiş. Mîsal ma vajê Rojîn Kabîşe vînî bî û çin bîye. Wargeh ra vejîyaye la bi rojan nêameye dîyene. Ma do vajê çi ame Rojîne ser? Dima ra eşkera bî ke rastî zaf cîya ya. Dosya de îhmalê girdî est ê, gumanbarê qetilkerdişî est ê. Ma cinî hemverê nê zordarîyan sere netewênenê û têkoşîn kenê. Heta sîyasetê asayîşî yê zordar û radîkalî bibê şîdetê cinîyan ser do bidomîyo. Semedê nê çareserîya aştîyane lazim a. Semedê nê ganî cinî wayîrê prosesî vecîyê.”