MÛŞ-Şaredariya Kopê li Navenda Bêhnvedanê ya Jinan şitlên firîngî û îsotan li jinan belav kir.

 

Şaredariya Kopê ya Mûşê bi armanca zêdekirina hevgirtin û keda jinan li Navenda Bêhnvedanê ya Jinan a Evrim, ku bi şaredariyê ve girêdayî ye, şitlên firîngî û îsotan li jinan belav kir. Di belavkirinê de, ku ji navend û taxên gundan beşdarbûnek mezin çêbû, şitil bêpere li jinan hatin belavkirin. Jin dê şitlan li baxçe, rez û baxçeyên xwe biçînin.

 

'Em hilberînê zêde dikin'

 

Hevşaredara Şaredariya Kopê Aryan Dogan di civîna belavkirina şitilan de bi jinan re diyar kir ku ew girîngiyê didin têgeha şaredariya komunal û got, "Jin, wekî her derê, li Kopê dikarin hilberînin û dest bidin jiyana bajêr. Em her gav hebûn û piştgiriya jinan hîs dikin. Bi nêzîkatiya 'şaredarî komun e, komun şaredarî ye', em hewl didin ku pergalekê ava bikin ku li ser hilberîn, hevgirtin û parvekirinê ava bibe."