NAVENDA NÛÇEYAN - Meclisa Jinan a Malbatên Şehîdan a Qamişlo civîna xwe ya salane li dar xist. Ev civîn bi armanca amadekariya lidarxistina konferana giştî ya meclisê hat organîzekirin.

 

Meclisa Jinan a Malbatên Şehîdan a bajarê Qamişloyê, civîna xwe ya salane bi beşdarbûna hejmarek zêde ya dayîk, xwişk, hevjîn û zarokên şehîdan li navenda Çand û Hunerê ya Mihemed Şêxo ya Qamişloyê li dar xist.

 

Paşê endama rêveber a Meclisa Malbatên Şehîdan Cewahir Osman axivî û bal kişand ser rewşa siyasî û civakî ya jinan û giringiya beşdarbûna jinan di çêkirina biryara siyasî de anî ziman.

 

Cewahir Osman banga Aştî û Civaka Demokratîk a Rêberê Gelê Kurd Abdullah Ocalan bibîr xist û domadina tecrîdê, her wiha bêhelwestiya dewleta Tirk bi tundî rexe kir.

 

Cewahir Osman, peymana 10’ê Adarê ya di navbera Fermandarê QSD’ê Mazlûm Ebdî û Serokê Hikumeta Veguhêz a Sûriyeyê Ehmed El Şeri de hatiye îmzekirin, bibîr xist û diyar kir ku: “Hikûmeta Veguhêz a Sûriyeyê di pêkanîna xalên peymanê de xwe dide paş. Rêveberiya Xweser baştirîn nimûneya serkeftî ku dikare xizmeta gelê Sûriyeyê û pêşeroja wî bike.”

 

Cewahir Osman di dawiya axaftina xwe de jî bal kişand ser giringiya rola jinan di hemû qadan de û got ku jin şirîka sereke ya pêkanîna aştiya li herêmê ye.

 

Di berdewama civînê de beşdaran nîqaş dan destpêkirin. Di nava nîqaşan de mijarên wekî vegera koçberên Efrîn, Serêkaniyê û Girê Spî. Di heman demê de behsa rewşa kampan û zehmetiyên jiyanî yên li wir têne jiyankirin, hat kirin.

 

Beşdaran daxwaz kir ku tecrîda li ser Rêberê Gelê Kurd Abdullah Ocalan were rakirin û rê were dayîn ku Abdullah Ocalan serkêşiya xebatên pêkanîna Banga Aştî û Civaka Demokratîk bike.

 

Ev civîn di çarçoveya rêzecivînên amadekirina konferansa giştî ya Meclisa Jinan a Meclisa Malbatên Şehîdan de bi rê ve çû.