Melîke Aydin

 

ÎZMÎR- Cinîyê femînîstî dîyar kerdî ke komelî de serdestbîyayîşê ziwanê aştîye şert o û semedê aştî mumkin bo ganî ziwanê aştîye bêro awankerdiş.

 

Şarê kurdî semedê heqê xo 40 serrî têkoşîn danê û bêşik yê tewr zêde nê hawirê pêrodayîş û şer ra zirar vînay cinî bîy. Semedê nê zî ganî cinî awanbîyayîşê aştîye de rolê aktîf kay bikerê. Cinîyê femînîstî dîyar kerdî ke semedê aştîya komelî ganî ziwanê aştîye serdest bo û tewr zêde bajarê rojawanî wayîrê proje vejîyê û semedê aştîye bername bêrê viraştiş.

 

‘Ganî komel vatişê aştîye ra nêterso’

 

Cinîyê Aştîye yê Foçayî Nursen Coşkun wina dîyar kerd: “Ganî komel yewbînan fam bikerê û vatişê aştîye nêtersenê. Semedo ke hukmêk wina est o. Roja ma ameyê awankerdiş semedê mîyanê ma de aştî est o ma sey ‘terorîst’ ameyî vînayîş. Nêvînayê ke ma hetê xoza, merdim, cinîyan û şîdetî ra dûrî yê. Nika hûmara ma roj bi roje pîl benê. Aştî rayîrêk derg o.  La bi rêxistine û hêvîye zehmetî eşkenê bêrê çareserkerdiş. Pêro kesê aştîye wazenê eşkenê çalakîyê pîl pê bikerê. Ganî vernîya her çî ziwanê aştîye bibo. Ganî fîlmê muhtewayê înan aştî bêro mojnayîş. Ganî belgefîlm û festîvala aştîye pê bêro.”

 

‘Ganî dewlete game bierzo ke endîşe werte ra wurzê’

 

Meclîsê cinîyan ê DEM Partî yê Balikesîrî Tellî Işik zî wina va: “Ganî rêxistinê komelê sivîlî û kede û demorkasî bêrê têhet û aştî qal bikerê. Hetêk ra hema hemverê prosesî bêbawer ê. Ganî ma aştîye qal bikerê. Semedê tewr ewil ma cinî û tutî do biserkewê. Ganî dewlete zî gaman bierzo ke endîşe werte ra wurzo. Bajarê rojawan wayîrê aştîye vejîyê do hîn manayîn bo. Butçe xeylê xo şino şerî ro. Nê hetî ra cinî bi înat û sebir aştîye her çar hetê vila bîyî.”

 

‘Ganî cinî mabêne şaran de pirdan awan bikerê’

 

Platformê Cinîyan ê Dîkîlî ra Zelîha Dagli zî wina va: “Bêaştî cuye mumkin nîya. Ganî waştişê aştî bêro berzkerdiş. Lazimîyê aştîye tewr zêde cinî hîs kenê. Ganî cinî hêz bikerê yew û mabêne şaran de pirdan awan bikerê. Butçe şerî rê yena visnayîş. Vera şerî ganî cuye bêro tercihkerdiş. Her tim camêrdî şeran awan kenê û cinî zî feqîr benê. Ganî bindestî vengê xo berz bikerê. Ganî cinî pirdan awan bikerê. Ganî ziwanê dewlete bivuryo. Semedê nê zî ganî cinî vengê xo berz bikerê. Ziwanê camêrdan do cinî birijnê.”