Elfazî Toral

 

STENBOL - Dayîka tepişteyan Sînem Guzel da zanayîş ke ganî tepişteyê sîyasî lezkî biresê azadîya xo û dîyar kerd ke pêwa pêro tedayê dewlete ê azadî, aştî û yewîye pawenê.

 

Binpaykerdişê heqan ê tepişteyan bi polîtîkayê tecrîdî her ke şinê giran benê. Yew nê zîndanan ra zîndanê cinîyan ê Bakirkoyî yo. Cigêrayîşê por û solan yenê kerdiş û îşkenceyê psîkolojîk dewam keno. Sewbîna tepişteyan rê cigêrayîşê zitî yeno ferzkerdiş û bi cezayê dîsîplînî dir yenê verdayîş, şîdetê psîkolojîkî û her tewirî bînî yenê kerdiş. Dayîka tepişteye Hatîce Guzele 9 serrî yo zîndanê Cinîyan ê Bakirkoyî de manena, Sînem Guzel derheqê babete de qisey kerd.

 

Sînem Guzel dîyar kerd ke kurdî bi serran o binê tedayan de yê û wina va: “Bi serran o ma zulm û heqeretan vînenê. Kurdî 40 serrî yo têkoşîn kenê. No proses do bi aştî û edalet netîce bibo. Kênaya mi Xecê wexto ke qije bî 1994-1993ine de dewa ma veşnayî. Ma zimistanî bêkeye mendî. Hîrê rojî ma teber de mendî. Îmkanî çinbî. Ma dewe ra vejîyayî û ameyî Stenbol. Ma pêro merdim ê. Gelo Misliman tena merdim ê? Her kes merdim o. Kênaya mi Xecê rojnamegere bî. Vilakera Kovara Ozgur Halkî bî. Şîne Wan de xebityayîne. Serrêke dima tepişya.”

 

‘Bi desan rey amî tehdîdkerdiş’

 

Sînem Guzel dewam de wina va: “Kênaya mi xeylê rey ameye tehdîdkerdiş. Kênaya mi zîndanê Wanî de mende û dima ra zî surgunê xeylêk bajaran amî kerdiş. Dimayê Wanî surgunê Anqara amî kerdiş. Serrêke aye pirr nêbî vetî dadgehe. Avûkate geyra û va, Xecê tahlîye bîye. Ma wuştî şî la avûkate geyra û va, ancî ameya tepiştiş. Amed, Wan, Anqara û Stenbol de 4 dosyayê aye est ê. 9 serrî yo zî tepişte ya.”

 

‘Pêwa pêro tedayan ma aştîye wazenê’

 

Sînem Guzel dewam de wina va: “Tutê ma zîndan de her tewir teda vînenê. 9 serrî yo dem bi dem aye kenê hucreya yewkesî. Aşmêke qedexeyê pêvînayîşî danê. Zîndanan de tepişteyê nêweşî est ê. Nê prosesî dir tepişteyî bêrê veradayîş. Pêwa pêro tedayan ma destê aştîye derg kenê. Her tim zulm tepişteyan rê kenê. Pêvînayîşê telefonî de zextan kenê. Kamereyan danê ro. Tepişteyî nê qebûl nêkenê. Nê semedî ra zî cezaya dîsîplînî birnenê.”

 

‘Hêvîya ma est a’

 

Sînem Guzel tewr peyîn wina va: “Ma hemverê îradeyê tutanê xo rêzdar ê. Demo ke ma şinê pêvînayîş sey çîyêk nêbîyo bi coş û moral yenê. Ma hemverê kede û xoverdayîşê înan rêzdar ê. Hêvîya ma est a. Pêwa ke kezeba ma dayîkan veşena ma vanê aştî. Ma hetê aştî û edaletî yê. Ma zulm nêwazenê.”