Li gelek bajarên Serhadê bi boneya 8'ê Adarê Roja Jinan a Cîhanê pîrozbahî, civîn û daxuyanî hatin lidarxistin.

 

Îdir

 

Partiya Wekhevî û Demokrasiyê ya Gelan (DEM Partî), bi rêya Meclîsa Jinan, bi boneya 8'ê Adarê Roja Jinan  a Cîhanê li avahiya Rêxistina partiya xwe a Îdirê bi dirûşma "Em Bi Berxwedanê Azad Dikin, Em Civatek Demokratîk Ava Dikin" civînek jinan li dar xist. Pankartek bi nivîsa "Em li dijî kuştina jinan serî hildidin, em ber bi azadiyê ve dimeşin" hate vekirin. Parlamentera Agrî ya DEM Partiyê Nejla Demîr û gelek jin beşdarî civînê bûn. Piştî deqeyek rêzigiritnê, li ser navê Meclîsa Jinan a Dem partiyê berdevka meclisê Bahar Etrece axaftina vekirinê kir.

 

'Têkoşîn û berxwedana jinan li her derê ye'

 

Bahar Etrece, li ser pêvajoya berdewam şîrove kir û diyar kir ku divê di vê pêvajoyê de berpirsiyariyeke cidî were girtin. Bahar Etrece got, "Têkoşîna jinan li dijî pergala serdestiya mêran serî hildaye û dê mêran jî azad bike. Pergalê jinan bindest û îşkence kir; lê tiştek ji bîr kir: Têkoşîn û berxwedana jinan li her derê ye û dê her cihî veguherîne qadeke berxwedanê."

 

Parlamentera Dem Partiyê Nejla Demîr û Hevşaredara Îdirê Nejla Kum jî axivîn û 8'ê Adarê li jinan pîroz kirin.

 

Hevdîtin bi govendê bi dawî bû.

 

Agirî

 

Di çarçoveya pîrozbahiyên 8'ê Adarê Roja Jinan a Cîhanê de, li navenda bajarê Agirî, bi pêşengiya Tevgera Jinên Azad (TJA) meşek hate lidarxistin. Meşa ku ji ber pirtûkxaneya giştî ya kevin dest pê kir, li ser Kolana Cumhuriyetê heta Qada Şakiro berdewam kir. Hevşaredara  Agirî Hazal Aras, endamên meclîsên jinan ên Partiya Wekhevî û Demokrasiyê ya Gelan (DEM Partî) û Partiya Herêmên Demokratîk (DBP) û gelek jinên din beşdarî meşê bûn. Di tevahiya meşê de, jinan gelek caran dirûşmên "Jin jiyan azadî" û "Jin jiyan azadî, dê jin azad bike rêberî" berz kirin.  Piştî meşê, jin gihîştin qada Şakiro û li wir bi govend, stran û dirûşman 8'ê Adarê pîroz kirin.

 

Hevşaredara Agirî Hazal Aras li qadê axivî û bal kişand ser berpirsiyariya jinan di cîhanekê ku şer berdewam dikin û aştî nehatiye bidestxistin. Hazal Aras got, "Heke şer berdewam bikin û aştî neyê û em jin nikaribin vî şerî rawestînin, em dibin şirîkê vê. Heta ku ruhê berxwedanê li cem me hebe, em ê jin bin. Heta ku em jin bin, em ê mirov bin û heta ku em mirov bin em ê azadiyê pêk bînin."

 

Çalakî bi govendên gelêrî bi dawî bû.

 

Qers

 

Li navenda DEM Partiyê ya Qersê , bi pêşengiya Meclîsên Jinan ên DEM Partiyê û DBP'ê yên bajêr, ji bo bîranîna 8'ê Adarê Roja Jinan a Cîhanê civînek jinan hate lidarxistin. Civîna ku bi dirûşma "Em jiyaneke azad û wekhev ava dikin" hate lidarxistin, gelek jin beşdar bûn.

 

Hevseroka Bajarê Qersê ya DEM Partiyê Arzu Savaş Derman di civînê de axivî û diyar kir ku 8'ê Adarê têkoşîna jinan ji bo wekhevî, azadî û jiyanê sembolîze dike. Arzu Savaş Derman diyar kir ku jin bi salan e li dijî pergala serdest a mêran li ber xwe didin û got, "8'ê Adarê roja ked, berxwedan û lêgerîna azadiyê ya jinan e. Her ku jin werin cem hev û hevgirtinê xurt bikin, deriyên jiyaneke wekhev û azad dê vebin."